मुंबईत कोविडची लस घेतल्यानंतर दीड तासात ज्येष्ठ नागरिकाचा मृत्यू; महापालिकेकडून चौकशी समिती स्थापन

कोविड लसीकरणानंतर मुंबईत एक दुर्देवी घटना घडली आहे. कोरोनाची लस घेतल्यानंतर अवघ्या दीड तासात एका ज्येष्ठ नागरिकाचा मृत्यू झाल्याची धक्कादायक घटना घडली आहे. (senior citizen dies after Covid vaccine in mumbai)

corona vaccination

भीमराव गवळी | Updated on: Mar 09, 2021 | 8:37 PM

मुंबई: कोविड लसीकरणानंतर मुंबईत एक दुर्देवी घटना घडली आहे. कोरोनाची लस घेतल्यानंतर अवघ्या दीड तासात एका ज्येष्ठ नागरिकाचा मृत्यू झाल्याची धक्कादायक घटना घडली आहे. या घटनेनंतर महापालिकेने या प्रकरणाचा तपास करण्यासाठी वैद्यकीय तज्ज्ञांची समिती नेमली असून या प्रकरणाचा तपास करण्यात येणार आहे. (senior citizen dies after Covid vaccine in mumbai)

काल ८ मार्च रोजी मुबंईतील एका खाजगी रुग्णालयाच्या लसीकरण केंद्रात ‘कोविड-१९’ लसीकरण सुरू होते. यावेळी एका ६८ वर्षीय नागरिकाने दुपारी ३.३१ वाजता कोविशिल्डची लस टोचून घेतली. मात्र, लसीची मात्रा दिल्यानंतर ते बेशुध्द झाले. यामुळे त्यांना तातडीने आपत्कालीन परिस्थितीतील आवश्यक असलेले औषधोपचार करून त्वरीत त्याच रुग्णालयाच्या अतिदक्षता विभागात पुढील औषधोपचारासाठी दाखल करण्यात आले. परंतु. दुर्दैवाने सायंकाळी. ५.०५ वाजता त्यांना मृत घोषित करण्यात आले. सदर बाब पोलिस यंत्रणेला कळविण्यात आली व त्यानंतर या ज्येष्ठ नागरिकाचा मृतदेह शवविच्छेदनाकरीता जे.जे. रुग्णालयात पाठविण्यात आला, अशी माहिती महापालिकेच्या जनसंपर्क विभागाने दिली आहे.

समिती चौकशी करणार

या जेष्ठ नागरिकाचे शवविच्छेदन आज 9 मार्च रोजी केले जाणार आहे. शवविच्छेदनाच्या अहवालानंतर अत्यंत आवश्यक बाब म्हणून लसीकरणानंतर घडणाऱ्या प्रतिकूल घटनेबाबतची चिकित्सा (Causality assessment) करण्यासाठी तज्ज्ञ वैद्यकिय समिती स्थापन करण्यात आली आहे. या समितीची त्वरित बैठक आयोजित करण्यात येणार असून ही समिती मृत्यू बाबतची कारणमिमांसा करणार आहे, अशी माहिती पालिकेने दिली आहे.

एका दिवसात 3 लाख 90 हजार लाभार्थ्यांना लस

केंद्र शासनाच्या आदेशान्वये मुंबईत 33 सार्वजनिक रुग्णालये व 38 खासगी रुग्णालये आदी एकूण 71 रुग्णालयांमधील लसीकरण केंद्रात ‘कोविड-19’ लसीकरण सुरू करण्यात आले आहे. या लसीकरण मोहिमेदरम्यान 8 मार्चपर्यंत 1,62,598 आरोग्य कर्मचारी, 1,11,078 कोविड आघाडीवर काम करणारे कर्मचारी, 60 वर्षे व अधिक वयाच्या 1,05,867 व्यक्ती व 45 ते 59 वर्षे वयोगटातील सहव्याधी असलेले 11,395 असे एकूण 3,90,938 लाभार्थ्याना कोविड लस देण्यात आली आहे.

लसीकरणानंतर ताप आणि अशक्तपणा

सर्वसाधारणपणे लसीकरणानंतर सौम्य प्रकारची लक्षणे लाभार्थ्यांमध्ये येतात. उदा. इंजेक्शन दिलेल्या ठिकाणी दुखणे, हलकासा ताप, अशक्तपणा, चक्कर येणे आदी. तसेच आतापर्यंत 16 लाभार्थ्यांना एक किंवा दोन दिवसासाठी रुग्णालयात देखरेखीसाठी दाखल करण्यात आले होते, असंही पालिकेने म्हटलं आहे. (senior citizen dies after Covid vaccine in mumbai)