पक्षाच्या आदेशाला केराची टोपली, नगरमध्ये राष्ट्रवादी नगरसेवकांची भाजपला मतं

अहमदनगर : अहमदनगर महापालिकेच्या महापौरपदाच्या निवडणुकीत अभद्र युती समोर आली आहे. 14 जागा मिळवून तिसऱ्या क्रमांकावर असलेल्या भाजपने राष्ट्रवादी काँग्रेससोबत अभद्र युती करत, महापौरपदाच्या निवडणुकीत विजय मिळवला. महापालिका निवडणुकीत शिवसेना 24 जागांसह पहिल्या क्रमांकावर होती, मात्र भाजपने स्वत:चे 14 अधिक दुसऱ्या क्रमांकावरील राष्ट्रवादीचे 18 तसंच बसपाचे 4 आणि अपक्ष 1 असा मिळून 37 जागांचं बळ पदरात पाडून घेतलं. त्यामुळे भाजपचे बाबा वाकले महापौरपदी विजयी झाले. त्यांना 37 मते मिळाली. तर शिवसेनेचे बाळासाहेब बोराटे यांना 23 मते मिळाली.

राष्ट्रवादीचे प्रदेशाध्यक्ष काय म्हणाले?

अहमदनगरमध्ये भाजपला पाठिंबा देऊ नये, असे स्पष्ट आदेश पक्षाकडून देण्यात आले होते. पाठिंबा देणाऱ्या नागरसेवकांकडून पाठिंबा दिल्याबद्दल सप्ष्टीकरण मागितले जाईल. तसेच, पक्ष शिस्तभंगाची कारवाई केली जाईल, अशी माहिती राष्ट्रवादीचे प्रदेशाध्यक्ष जयंत पाटील यांनी दिली.

राष्ट्रवादी काँग्रेसने भाजपशी युती केल्यामुळे काँग्रेसच्या 5 नगरसेवकांनी मतदानावर बहिष्कार घातला. त्यामुळे भाजपचा मार्ग आणखी सुकर झाला. 68 सदस्य संख्या असलेल्या महापालिकेत 35 ही मॅजिक फिगर होती.  तिसऱ्या नंबरवर राहूनही शिवाजी कर्डिले यांनी महापौर भाजपचाच होईल, असा दावा यापूर्वीच केला होता. तसंच त्यांनी आज करुन दाखवलं.

राष्ट्रवादी काँग्रेस पक्ष जातीयवादी असलेल्या भाजपसोबत गेल्याने आम्ही मतदान करणार नाही, अशी स्वाभाविक भूमिका काँग्रेसच्या गटनेत्यांनी घेतली आणि काँग्रेसने निवडणुकीवर बहिष्कार टाकला.

अभद्र युती

एकंदरीत अहमदनगरमध्ये सासरे शिवाजी कर्डिले यांची भाजप आणि जावई संग्राम जगताप यांची राष्ट्रवादी अशी अभद्र युती पाहायला मिळाली. त्यामुळे नगरमध्ये पुन्हा सोयरे धायऱ्यांचं राजकारण सुरु झालं.

अहमदनगर महापालिका निवडणूक अंतिम निकाल 2018 :

• शिवसेना – 24
• राष्ट्रवादी -18
• भाजप -14
• काँग्रेस – 5
• बसपा – 04
• समाजवादी पक्ष – 01
• अपक्ष 2
• एकूण – 68