मुलांनी आई-वडीलांच्या कष्टाचे पांग फेडले, वृत्तपत्र विक्रेत्याची दोन्ही मुले प्रशासकीय सेवेत दाखल

सांगली | 8 मार्च 2024 : आई-वडीलांनी केलेल्या कष्टाचे सार्थक तेव्हाच होते जेव्हा मुले त्यांच्या-त्यांच्या क्षेत्रात नावलौकीक मिळवितात. सांगलीतील एका वृत्तपत्र विक्रेत्यांच्या दोन्ही मुलांनी प्रशासकीय सेवेत दाखल होत आई-वडीलांच्या कष्टाचे चीज केले आहे. त्यामुळे या मुलांसोबत त्यांच्या आई-वडीलांचे देखील सर्व स्तरातून अभिनंदन केले जात आहे. सांगलीच्या उपनगर अभय नगरात राहणाऱ्या वृत्तपत्र विक्रेते भारत मासाळ यांनी मोठ्या मेहनतीने पहाटे लवकर उठून आपला वृत्तपत्र विक्रीचा व्यवसाय नेमाने चालविला. त्यांच्या दोन्ही मुलांनी ऋुतुजा आणि उमेश यांनी प्रशासकीय सेवेत प्रवेश मिळविला आहे.

घरची परिस्थिती बेताची तरीही आपला वृत्तपत्र विक्रीचा व्यवसाय करीत पैशाला पैसा जोडत अभयनगरात राहणाऱ्या भारत विठोबा मासाळ यांनी सकाळी वृत्तपत्र विक्री त्यानंतर दुपारी छोटेखाणी गॅरेज चालवून आपला मुलगा उमेश आणि मुलगी ऋुतुजा यांना शिक्षण दिले. गरिबीची परिस्थिती असतानाही दिवस-रात्र काबाडकष्ट करून भारत मासाळ यांनी आपल्या मुलांचे शिक्षण पूर्ण केले त्यांना वह्या-पुस्तके कसलीही कमी पडू दिली नाही. यासाठी त्यांची पत्नी यशोदा मासाळ यांनीही मोठी साथ दिली. कोणत्याही आई-वडिलांचं स्वप्न हेच असते की त्यांच्या मुलांनी आईबापाचं नाव काढावे, हाच उद्देश आणि ध्येय ठेवून भारत मासाळ यांनी जिद्दीन आपल्या मुलांना शिकवलं. परंतू मुलांनी आई-वडीलांचं स्वप्न जिद्दीनं साकार केले.

आपल्या मुलांना गरिबीचे चटके बसू नयेत यासाठी मासाळ दाम्पत्याने मुलांना प्रोत्साहन देत प्रशासकीय सेवेकडे जाण्यासाठी प्रवृत्त केले. आज अखेर भारत मासाळ यांची दोन्ही मुलं प्रशासकीय सेवेत दाखल झाली आहेत. त्यांची मुलगी ऋतुजा हिची भूमिअभिलेख अधिकारी पदी निवड झाली आहे. तर मुलगा उमेश हा सार्वजनिक बांधकाम विभागामध्ये कनिष्ठ अभियंता या पदावर रुजू झाला आहे. आपली दोन्ही मुलं आता प्रशासकीय सेवेत रुजू झाल्यामुळे मासाळ कुटुंबाचा आनंद गगनात मावेनासा झाला आहे. पंचक्रोशीतून त्यांचे अभिनंदन केले जात आहे.