मैत्रिणच बनली फेक बॉयफ्रेंड अन् झाला उलटाच गेम, साताऱ्यात खळबळ, एक्स्ट्रा मॅरिटल अफेयर पेक्षाही भयंकर घटना

सोशल मीडिया हे अभासी जग आहे. इथे सगळं खरं आहे, असा विश्वास ठेवणं योग्य नाही. कारण इथे कोण व्यक्ती कधी कुणाची कशी फसवणूक करेल, याचा भरोसा नाही. त्यामुळे सोशल मीडियाचा वापर करताना आपण खूप सावध राहिलं पाहिजे. विशेष म्हणजे मुलींनी सोशल मीडियाचा वापर करताना सजग राहिलं पाहिजे. कोण कधी कशा पद्धतीने बोलण्यात गुंतवून फसवणूक करेल, याचा भरोसा नाही. त्यामुळे आपण सोशल मीडियावर कुणावरही सहज विश्वास टाकू नये. सोशल मिडिया खूप सहजपणे उपलब्ध असल्यामुळे कुणीही त्यावर सहज उपलब्ध असते. सोशल मीडियाचा तसा फायदा आहे. या सोशल मीडियामुळे संपूर्ण जग जवळ आलं आहे. पण या सोशल मीडियाचा वापर काही जण फसवणूक करण्यासाठी किंवा इतरांना चुकीची माहिती देण्यासाठीदेखील करतात. त्यामुळे आपल्याला त्याचा धोका देखील उद्भवू शकतो. कारण सोशल मीडियाचा वापर करत असताना अशा काही घटना घडतात ज्यामुळे आपण नैराश्यात जातो आणि नको तो टोकाचा निर्णय घेतो. साताऱ्यात अशीच काही घटना समोर आली आहे.

साताऱ्यात एका तरुणीने स्वत: ला संपवण्याचा टोकाता निर्णय घेतला. तिचा हा निर्णय घेण्यामागील कारण समोर आल्यानंतर अनेकांना धक्का बसला आहे. एका जवळच्या मैत्रिणीमुळेच तिला हा टोकाचा निर्णय घ्यावा लागला. सुरुवातीला संबंधित घटना ही एक आत्महत्येची घटना वाटत होती. पण तरुणीच्या आत्महत्येमागील नेमकं कारण काय असावं? असा प्रश्न उपस्थित होता. तरुणीचं वैयक्तिक आयुष्य, कुटुंब सर्व व्यवस्थित होतं. असं असताना तिने आत्महत्या का केली असावी? असा प्रश्न तिच्या कुटुंबियांकडूनही उपस्थित करण्यात येत होता. अखेर या आत्महत्येचं गूढ उकलण्यात पोलिसांना यश आलं आहे. पोलिसांच्या तपासात या प्रकरणात धक्कादायक माहिती समोर आली आहे.

पोलिसांच्या तपासात नेमकं काय समोर आलं?

साताऱ्याच्या तरुणीच्या आत्महत्येला तिची मैत्रिणीच कारणीभूत ठरल्याचं समोर आलं आहे. तिच्या मैत्रिणीने मस्करी करण्यासाठी एका मुलाच्या नावाचं अकाउंट उघडलं होतं. तिने स्वत:च्याच मैत्रिणीला फ्रेंड रिकवेस्ट पाठवली. यानंतर संबंधीत मुलीनं ही रिकवेस्ट एक्सेप्ट केली. नंतर ही मुलगी रिकवेस्ट पाठवणऱ्या मनिष नावानं बनावट अकाऊंट असणाऱ्याच्या प्रेमात पडली. मात्र मनिषला भेटण्याचा आग्रह मैत्रीण करु लागल्यावर तिच्या मैत्रिणीची चांगलीच पंचायत झाली.

यानंतर मैत्रिणीची फसवणूक करणाऱ्या तरुणीने शिवम पाटील नावाने दुसरं अकाऊंट बनवत मनिष मृत झाला असल्याचं सांगितलं. तिला मनिषचे दवाखान्यातील नकली फोटो देखील पाठवले. यामुळे तिच्या 24 वर्षीय मैत्रिणीला हा धक्का सहन झाला नाही. तिने विरहातून गळफास घेवून आत्महत्या केली. ही घटना 12 जूनला घडली. यानंतर पोलिसांत ही नोंद अकस्मात मृत्यू म्हणून झाली होती. मात्र पोलिसांनी याचा तपास केल्यानंतर धक्कादायक प्रकार उघडकीस आला. संबंधित मैत्रिणीने हा सर्व प्रकार इंस्टाग्रामच्या माध्यमातून घडवून आणल्याचं लक्षात आल्यानंतर मृत मुलीच्या मैत्रिणीला अटक करण्यात आली आहे. या घटनेची नोंद वाठार पोलीस ठाण्यात झाली आहे.