3-4 दिवसात मविआची उमेदवार यादी जाहीर झालीच पाहिजे अन् वंचित…; माजी मुख्यमंत्र्यांचं वक्तव्य

सागर सुरवसे, प्रतिनिधी- टीव्ही 9 मराठी, प्रतिनिधी- टीव्ही 9 मराठी | 11 मार्च 2024 : आठवड्याभरात लोकसभा निवडणुकीची घोषणा होऊ शकते. अशात महाराष्ट्रातील महायुती आणि महाविकास आघाडीचं जागावाटप अद्याप जाहीर झालेलं नाही. वंचित बहुजन आघाडी महाविकास आघाडीत सामील होणार का? याबाबतही राज्याच्या राजकीय वर्तुळात होत आहे. राज्याचे माजी मुख्यमंत्री आणि काँग्रेसचे वरिष्ठ नेते सुशीलकुमार शिंदे यांनी महाविकास आघाडीच्या जागावाटपावर बोलले आहेत. येत्या तीन ते चार दिवसात महाविकास आघाडीची उमेदवार यादी जाहीर झाली पाहिजे असं मला वाटतं. महाविकास आघाडीच्या उमेदवारीच्या यादीत वंचितही असली पाहिजे, असं सुशीलकुमार शिंदे म्हणाले.

वंचितबाबत काय म्हणाले?

महाविकास आघाडीसोबत प्रकाश आंबेडकर येतील. मागील निवडणुकीत त्यांना अनुभवाचे चटके बसले आहे. यातून ते सुधारतील अशी माझी कल्पना आहे. वेगळा असं काही होणार नाही. लोकांनी आता ठरवलं पाहिजे. वंचित बाबत मागच्या निवडणुकीत आलेला अनुभव, नागरिकांनी त्यातून मतदान केलं पाहिजे, असंही शिंदे म्हणाले.

प्रणिती शिंदेंना उमेदवारी?

सोलापूरमधून प्रणिती शिंदे लोकसभा निवडणूक लढतील, अशी शक्यता व्यक्त केली जात आहे. त्यावरही सुशीलकुमार शिंदे यांनी प्रतिक्रिया दिली आहे. सोलापूर काँग्रेस सदस्यांची इच्छा आहे प्रणिती शिंदे यांना उमेदवारी मिळावी. उमेदवारीबाबत हाय कमांड निर्णय घेईल तो आम्हाला मान्य आहे. काँग्रेसचा कोणी उमेदवार असेल. त्यासाठी जिल्हा काँग्रेसकडून तयारी केली जात आहे. जिल्हा अध्यक्षांची अडचण असल्यामुळे प्रभारी जिल्हा अध्यक्ष नेमले आहे. जिल्ह्यात काँग्रेस पक्षाला ज्या ज्या ठिकाणी अडचण आहे. त्या त्या ठिकाणी डागडुजीचे काम सुरू आहे, असं ते म्हणाले.

भाजप कुणाला उमेदवारी देणार?

सोलापूरमधून भाजप कुणााल उमेदवारी देणार? यावरही शिंदेंनी प्रतिक्रिया दिली आहे. सोलापुरात भाजपला उमेदवारी मिळत नाही पण भाजप एखादा छुपा रुस्तम उमेदवार काढतील. 2019 साली भाजपने उमेदवार काढला त्याच्याकडे जातीचे प्रमाणपत्र नव्हते. ते प्रकरण कोर्टात चालू आहे.मात्र ते उमेदवारी बाबतीत कुणाचं काय काढतील ते सांगता येत नाही, असं सुशीलकुमार शिंदे म्हणाले.