Yavatmal Crime | पाच दिवसांनंतर चोरट्यांची बँकेत पुन्हा एन्ट्री, यवतमाळात बँकेचा हलगर्जीपणा?
पेट्रोलिंग करणारे पोलिसांचे वाहन दोनदा त्या ठिकाणाहून गेले. मात्र चोरट्यांनी अंधाराचा फायदा घेत पोलिसांचे वाहन जाताच बँकेत प्रवेश केला. यावेळी दोन चोरटे पाळतीवर असल्याचे एका सीसीटीव्हीत कैद झाले आहे. पाच दिवसांपूर्वी बँक ऑफ महाराष्ट्रमधून चोरट्यांनी साडेचार लाखाची रोख लंपास केली होती.
यवतमाळ : शहरातील मुख्य बाजार पेठ असलेल्या मेनलाईन परिसरातील बँक ऑफ महाराष्ट्रची (Bank of Maharashtra) शाखा पाच दिवसांपूर्वी चोरट्यांनी फोडून तब्बल साडेचार लाखांचा मुद्देमाल लंपास केला होता. त्यानंतर चक्क आज पहाटेच्या सुमारास चोरट्यांनी पुन्हा बॅंकेत प्रवेश करीत चोरीचा प्रयत्न केला. मात्र लॉकर उघडण्यात अपयश आल्याने चोरट्यांनी त्या ठिकाणाहून पळ काढला. बँकेतील सीसीटीव्ही कॅमेऱ्यात पाच चोरटे कैद झाले आहेत. घटनेचे गांभीर्य लक्षात घेता शहर ठाणेदार नंदकुमार पंत (Thanedar Nandkumar Pant), एलसीबीतील अधिकारी, कर्मचाऱ्यांनी घटनास्थळी धाव घेत पाहाणी केली. शहरातील मेनलाईन परिसरातील (Mainline Premises) बँक ऑफ महाराष्ट्रसमोर दोन चोरटे तब्बल अर्धातास अंधारात बसून होते. त्या ठिकाणी चोरट्यांनी अंगावरील कपडेही बदलून कलरींगच्या कामाचे परिधान केले.
पोलीस पेट्रोलिंगवर, चोरांनी घेतला अंधाराचा फायदा
पेट्रोलिंग करणारे पोलिसांचे वाहन दोनदा त्या ठिकाणाहून गेले. मात्र चोरट्यांनी अंधाराचा फायदा घेत पोलिसांचे वाहन जाताच बँकेत प्रवेश केला. यावेळी दोन चोरटे पाळतीवर असल्याचे एका सीसीटीव्हीत कैद झाले आहे. पाच दिवसांपूर्वी बँक ऑफ महाराष्ट्रमधून चोरट्यांनी साडेचार लाखाची रोख लंपास केली होती. यावेळी बँकेतील अधिकारी, कर्मचाऱ्यांमध्ये एकच खळबळ उडाली होती. घटनेचे गांभीर्य लक्षात घेता पोलीस अधिकारी, कर्मचारी त्या ठिकाणी दाखल झाले.
ठोस पुरावा लागला नाही
यावेळी पोलिसांना त्या ठिकाणी सुरक्षा रक्षक नसल्याचे आढळले. त्याचबरोबर सायरनदेखील बंद असल्याचे समोर आले होते. त्यामुळे पोलीस अधिकाऱ्यांनी संबंधित बँकेच्या अधिकाऱ्यांना सुरक्षेबाबत उपाययोजना करण्याच्या सूचना दिल्या. मात्र याकडे दुर्लक्ष करण्यात आल्याचे ही दुसरी घटना घडल्याचे बोलल्या जात आहे. शहर पोलीस ठाण्यापासून हाकेच्या अंतरावर असलेली बँक ऑफ महाराष्ट्रची शाखा पाच दिवसांत दोनदा चोरट्यांनी फोडली. एवढेच नव्हे तर दोन्ही वेळा चोरटे सीसीटीव्ही कॅमेऱ्यात कैद झाले आहेत. त्यामुळे या चोरट्यांच्या मुसक्या आवळण्याचे आव्हान पोलिसांसमोर येवून ठेपले आहे. घटनेचे गांभीर्य लक्षात घेता बँकेत फिंगरप्रिंट एक्सपर्ट, श्वान पथकाला पाचारण करण्यात आले आहे. मात्र ठोस सुगावा लागला नव्हता.
