AIMIM ला धक्का बसू नये म्हणून ओवेसींची अजून एक चाल; हैदराबादमधून दिली भावाला पण उमेदवारी; कारण तर समजून घ्या
Lok Sabha Election 2024 : गुजरातमधील सुरतचे उदाहरण डोळ्यासमोर ठेवत, AIMIM चे प्रमुख असदुद्दीन ओवेसी यांनी राजकीय सारीपाटावर एक मजबूत चाल चालली आहे. त्यांनी हैदराबाद लोकसभेच्या जागेवर आपल्याच पक्षाकडून दोन उमेदवार उभे केले आहेत. त्यांचा भाऊ अकबरुद्दीन ओवेसी पण निवडणूक आखाड्यात उतरला आहे.
तर आपला गड ढासळू नये, कोणी दगाफटका करु नये यासाठी AIMIM चे प्रमुख असदुद्दीन ओवेसी यांनी राजकीय सारीपाटावर एक अनोखी चाल चालली आहे. गुजरातमधील सुरतमध्ये काँग्रेसचे नीलेश कुंभानी यांना अनुमोदकच न मिळाल्याने भाजपने बिनविरोध ही जागा खिशात घातली.. देशात अनेक ठिकाणी ना-ना प्रकार घडत आहेत. त्यामुळे ओवेसी बंधू अगोदरच अलर्ट झाले आहेत. हैदराबाद मतदारसंघातून दोन्ही भावांनी नामनिर्देशन अर्ज दाखल केले आहेत. तुम्हाला वाटत असेल हे दोघे एकमेकांविरोधात लढत आहेत तर तसे नाही, त्यामागे आहे हे कारण…
अकबरुद्दीन विरोधी नाही तर पर्यायी उमेदवार
हैदराबाद मतदारसंघात एआयएमआयएमकडून दोन्ही भावांनी निवडणुकीत शड्डू ठोकले आहे. पण ते काही एकमेकांविरोधात उतरले नाहीत. तर अकबरुद्दीन ओवेसी यांनी पर्यायी उमेदवार म्हणून अर्ज दाखल केला आहे. जर काही कारणांनी असदुद्दीन ओवेसी यांचे नामनिर्देशन पत्र रद्द झाले. तर बॅकअप म्हणून पक्षाकडून अकबरुद्दीन ओवेसी हे निवडणुकीच्या आखाड्यात असतील. पक्षाचा एक उमेदवार निवडणुकीच्या आखाड्यात असेल.
सुरतमध्ये घडले काय
सुरत लोकसभा मतदार संघात काँग्रेसने नीलेश कुंभाणी यांना तिकीट दिले. त्यांनी निवडणूक अर्जासंबंधीची सर्व प्रक्रिया पूर्ण केली. पण त्यांच्या नामनिर्देशन पत्रावरील तीन अनुमोदकांच्या स्वाक्षरीवर हरकत घेण्यात आली. भाजपचे दिनेश जोधानी यांनी हे हस्ताक्षर बनावट असल्याचा दावा केला. निवडणूक निर्णय अधिकाऱ्यांनी त्यांनी बाजू मांडण्यासाठी पुरेसा कालावधी दिला. पण जिल्हाधिकारी कार्यालयात त्यांचे तीनही अनुमोदक काही आले नाही. त्यामुळे त्यांचे नामनिर्देशन पत्र रद्द करण्यात आले.
दगाफटका टाळण्यासाठी काळजी
आता हैदारबादमध्ये कुठल्याही प्रकारचा दगाफटका टाळण्यासाठी असदुद्दीन ओवेसी यांनी अगोदरच ही चाल चालली आहे. सुरतमध्ये अनाकलनीय प्रकारे इतर उमेदवारांनी माघार घेतली. त्यामुले भाजपचे दिनेश जोधानी हे बिनविरोध निवडून आले आहेत. . देशात सुरत सारखी अनेक उदाहरणे समोर आली आहे. त्यामुळे दगाफटका टाळण्यासाठी एआयएमआयएमने अकबरुद्दीन ओवेसी यांना मैदानात उतरवले आहे.
भाजपच्या माधवी लतांचे आव्हान
असदुद्दीन ओवेसी यांचा हा मतदारसंघ गड आहे. ते चार वेळा खासदार म्हणून निवडून गेले आहेत. येथील स्थानिक निवडणुकीत भाजपने काही दिवसांपूर्वी पूर्ण ताकद लावली होती. त्यामुळे हा मतदार खेचून आणण्यासाठी भाजप ताकदीने प्रयत्न करत आहे. याच मतदारसंघात असदुद्दीन ओवेसी यांचे वडील सलाहुद्दीन ओवेसी सहा वेळा निवडून गेले होते. आता ओवेसी यांना भाजपच्या माधवी लता यांनी तगडे आव्हान दिले आहे. तर भारत राष्ट्र समितीकडून गद्दाम श्रीनिवास यादव पण मैदानात आहेत.
