Rajya Sabha : लोकसभेतच नाही तर राज्यसभेत पण सत्ताधाऱ्यांना ‘बहुमत’; भाजप करणार असा रेकॉर्ड ब्रेक

लोकसभा निवडणुकीत भाजप नेतृत्वातील राष्ट्रीय लोकशाही आघाडीने तिसऱ्यांदा केंद्रात सत्ता स्थापन केली. संख्याबळानुसार, भाजप हा लोकसभेतील सर्वात मोठा पक्ष आहे. आता राज्यसभेत पण एनडीएचे बहुमत दिसेल. लोकसभा निवडणुकीत वरिष्ठ सभागृहातील काही सदस्य निवडून आले. त्या जागा आता रिक्त झाल्या आहेत. लवकरच या जागांवर निवडणूक होईल. एनडीए लवकरच बहुमत गाठेल. सध्या राज्यसभेत एनडीएच्या सदस्यांची संख्या 110 आहे. तर 10 जागांवर निवडणूक होणार आहे. त्यानंतर राज्यसभेत एकूण सदस्यांची संख्या पुन्हा 240 इतकी होईल. तर एनडीएची सदस्य संख्या 120 इतकी होईल. भाजप पहिल्यांदाच राज्यसभेत 99 हा आकडा पार करेल.

विरोधकांच्या हाती किती जागा?

रिक्त जागांपैकी सत्ताधाऱ्यांच्या 7 तर विरोधकांच्या हाती 3 जागा आहेत. यामध्ये काँग्रेसच्या दोन तर राष्ट्रीय जनता दलाची एक जागा आहे. सर्व जागा या विविध राज्यातील विधानसभा कोट्यातील आहेत. निवडणुकीनंतर या जागा सत्ताधाऱ्यांच्या गोटात येतील. राजस्थानमधील काँग्रेसचे वरिष्ठ नेते केसी वेणुगोपाल यांची एक जागा पण भाजपकडे येईल. बिहार, महाराष्ट्र आणि आसाममधील प्रत्येकी दोन जागा तर त्रिपुरा, हरियाणा, राजस्थान आणि मध्यप्रदेशातील प्रत्येकी एक जागा आहे.

निवडणूक आयोग लवकरच करेल घोषणा

निवडणूक आयोग या 10 रिक्त जागी निवडणुकीची लवकरच घोषणा करण्याची शक्यता आहे. नवीन तारीख लवकरच जाहीर होईल. राज्यसभेच्या एकूण सदस्य संख्या 250 इतकी आहे. यामध्ये 238 सदस्यांची विविध राज्यातील विधानसभा सदस्यातून निवड होते.तर 12 सदस्यांची निुयक्ती राष्ट्रपती करतात. यामध्ये कला, साहित्य, सामाजिक सेवेत सक्रिय काम करणाऱ्यांचा समावेश असतो. काही जागा रिक्त असल्याने राज्यसभेत 240 सदस्य होते. त्यातही 10 जागा रिक्त झाल्याने ही सदस्य संख्या आता 230 वर आली आहे. यामध्ये भाजपचे 90 सदस्य आहेत. यामध्ये 5 नामनिर्देशीत सदस्य पण आहेत.

या जागा झाल्या रिक्त

आसाम – कामाख्या प्रसाद तासा आणि सर्बानंद सोनोवाल

बिहार – मीसा भारती आणि विवेक ठाकूर

महाराष्ट्र – उदयनराजे भोसले आणि पियूष गोयल

हरियाणा – दीपेंद्र सिंह हुड्डा

मध्य प्रदेश – ज्योतिरादित्य शिंदे

राजस्थान – केसी वेणुगोपाल

त्रिपुरा – बिप्लब कुमार देब