Teesta Setalvad : सामाजिक कार्यकर्त्या तीस्ता सेटलवाड यांना 2 जुलैपर्यंत पोलीस कोठडी; अहमदाबाद कोर्टाचा निकाल

नवी दिल्ली : सामाजिक कार्यकर्त्या तीस्ता सेटलवाड (Teesta Setalvad) आणि माजी आयपीएस अधिकारी आर. बी. श्रीकुमार (R.B. Shrikumar) या दोघांना आज गुजरातमधील सत्र न्यायालयात हजर करण्यात आले होते. न्यायालयाने त्यांना 2 जुलैपर्यंत पोलीस कोठडी (Police Custody) सुनावली आहे. गुजरातच्या अहमदाबाद क्राईम ब्रँचने या दोघांनाही 14 दिवसांची न्यायालयीन कोठडी सुनावण्यासाठी विनंती केली होती. मात्र न्यायालयाने त्यांची ही विनंती अमान्य करीत 2 जुलैपर्यंत कोठडी मंजूर केली. तिस्ता सेटलवाड आणि माजी आयपीएस आरबी श्रीकुमार यांना आज अहमदाबाद मेट्रोपॉलिटन कोर्टाच्या खोली क्रमांक 22 मध्ये हजर करण्यात आले होते.

तपासासाठी विशेष पथक स्थापन

गुजरातचे डीजीपी आशिष भाटिया यांनी तीस्ता सेटलवाड प्रकरणाच्या तपासासाठी विशेष तपास पथक (एसआयटी) स्थापन केले आहे. या टीममध्ये एटीएसचे डीआयजी दीपन भद्रन, डीसीपी क्राइम चैतन्य मंडलिक, एसपी सुनील जोशी आणि एसओजीचे एसीपी बीसी सोलंकी हे सदस्य असणार आहेत. तीस्ता सेटलवाड यांना 2 जुलै रोजी न्यायालयात हजर करण्यात येणार आहे. 1 जुलै रोजी अहमदाबादमध्ये जगन्नाथ रथयात्रा आहे. त्यामुळे त्या दिवशी पोलीस बंदोबस्तात गुंतलेले असतील. याच कारणास्तव सेटलवाड यांना दुसर्‍या दिवशी म्हणजेच 2 जुलै रोजी न्यायालयापुढे हजर केले जाईल, असे पोलीस अधिकार्‍यांनी सांगितले. पोलिसांच्या विनंतीवरून न्यायालयाने तीस्ता सेटलवाड आणि आरबी श्रीकुमार यांना 2 जुलै रोजी दुपारपर्यंत हजर करण्याची परवानगी दिली आहे.

सेटलवाड यांना 25 जून रोजी मुंबईतून ताब्यात घेतले

तिस्ता सेटलवाड यांना शनिवारी 25 जून रोजी मुंबईतील जुहू येथील घरातून ताब्यात घेण्यात आले. यानंतर एटीएसने त्यांना अहमदाबाद गुन्हे शाखेच्या कार्यालयात आणले. यानंतर श्रीकुमार आणि तीस्ता सेटलवाड यांच्या अटकेबाबत अहमदाबाद क्राइम ब्रँचने पत्रकार परिषदेत माहिती दिली. (Social activist Teesta Setalvad remanded in police custody till July 2)