Yasin Malik : मला मृत्यूदंड द्या! सरला भट प्रकरणातल्या यासीन भटची अजब मागणी, प्रतिज्ञापत्रात नेमकं काय?

Sarla Bhat Murder Case : आपण कश्मीरी पंडित सरला भट हत्याकांड प्रकरणामध्ये निर्दोष असल्याचे मोहम्मद यासीन मलिकने कोर्टात सांगितलं आहे. बंदी घातलेल्या जम्मू काश्मीर लिबरेशन फ्रंटचा प्रमुख यासीन मलिकला विशेष न्यायालयात दाखल करण्यात आलं. यावेळी त्याने दावा केला की, आपल्याला अडकवण्यासाठीच हे सर्व प्रकरण तयार करण्यात आले आहे. आपल्यावर करण्यात आलेले आरोप हे सर्व निष्पक्ष पोलिस तपासाऐवजी बनावट प्रकरणासाठी हवे असतात तसे असल्याचे म्हटले आहे. तथापी, मलिक यांनी न्यायालयात खटला लढवण्यास नकार दिला असून आपल्याला फाशीची शिक्षा देण्यात यावी अशी मागणी केली आहे.

दरम्यान, ६० वर्षांचा यासीन मलिक बऱ्याच दिवसांपासून दिल्लीच्या तिहार जेलमध्ये आहे. १९ एप्रिल १९९० रोजी झालेल्या काश्मिरी पंडित सरला पंडित यांच्या हत्येत सहभागाचा आरोप यासीनवर करण्यात आलेला आहे. श्रीनगर राज्य तपास यंत्रणेने २९ जून रोजी विशेष न्यायालयात दाखल केलेल्या आरोपपत्रामध्ये मलिकचं नाव मुख्य आरोपी म्हणून प्रविष्ट केलं आहे. यालाच प्रतित्यूर म्हणून मलिक यांच्यावतीने न्यायालयात २५ पानांचे प्रतिज्ञापत्र सादर करण्यात आले आहे. तिहार मध्यवर्ती कारागृह क्रमांक 7 मध्ये सत्यापित केलेल्या या पत्रामध्ये खटला न लढवण्याचा घेतलेला हा निर्णय सद्सदविवेकबुद्धीतून घेतलेला निर्णय असल्याचे म्हटले आहे. माझ्या वैयक्तिक परिस्थितीचा काळजीपूर्वक विचार करुन मी खटला न चालवण्याचा निर्णय घेत आहे. माझ्या निर्णयाचा अर्थ कोणत्याही माझ्यावर लावलेल्या आरोपांमधील गुन्ह्यांची कबुली असा घेऊ नये, मी मृत्यूदंडाची मागणी करतो, असं म्हटलं आहे.

दरम्यान, आपल्या प्रतिज्ञापत्रात मलिकने आपल्यावरील आरोप पूर्णपणे खोटे असल्याचे नाकारले असून घटनेच्या तीन दशकांनंतर केले गेलेले सर्व आरोप हे एक षडयंत्र आणि मनाला वाटेल तसं रचलेलं प्रकरण असल्याचं म्हटलं आहे. त्याने असा दावा केला की, “एप्रिल १९९०मध्ये नरवारामध्ये बीएसएफच्या छाप्यादरम्यान इमारतीवरुन पडल्याने तो गंभीर जखमी झाला होता. त्यात तो कोमात गेला होता. तत्कालीन सरकारी दूरदर्शन आणि अनेक वृत्तसंस्थांनी त्यांच्या मृत्यूची बातमी दिली होती. जो व्यक्ती बेशुद्ध होता, मृत्यूशी झुंज देत होता. तो या गुन्ह्यात कसा सामील होऊ शकतो? तो कोणत्याही गुन्हेगारांना कशा काय सूचना देऊ शकतो किंवा मग तो स्वतः गुन्हा करु शकतो.”

मलिकने प्रतिज्ञापत्रात सरला भट यांचाही उल्लेख केला आहे. “सरला भट या माझ्या १३ वर्षांच्या लेकी रझिया सुलताना यांच्याइतकाच निष्पाप होत्या.” तसेच सरला सुरक्षा यंत्रणांसाठी माहिती देणारी म्हणून काम करत असल्याचा दावा मलिक यांनी फेटाळला आहे. सरला कोणत्याही गुप्त एजन्सीसाठी काम करत नव्हत्या किंवा त्यांनी मी कुठे लपलेलो आहे ही माहितीही दिली नव्हती.