एकाच दिवशी शपथ, एकत्रच राजीनामा, एकाच दिवशी वाढदिवस, फडणवीस-अजितदादांचा योगायोग

मुंबई : महाराष्ट्राचे उपमुख्यमंत्री अजित पवार (Ajit Pawar) आणि माजी मुख्यमंत्री, विधानसभेचे विद्यमान विरोधी पक्ष नेते देवेंद्र फडणवीस (Devendra Fadnavis) या दोघांचाही आज (22 जुलै) वाढदिवस. फडणवीसांनी वयाची 51 वर्ष पूर्ण केली, तर अजितदादांनी 62. महाराष्ट्राच्या संसदीय राजकारणात महत्त्वाची पदं भूषवणाऱ्या अजित पवार आणि देवेंद्र फडणवीस यांच्याबाबत एक वेगळाच योगायोग पाहायला मिळाला होता. दोन वेगवेगळ्या पक्षात असलेल्या या नेत्यांनी एकाच दिवशी शपथ घेतली होती, तर एकाच दिवशी राजीनामाही दिला होता.

भाजप नेते देवेंद्र फडणवीस यांचा जन्म 22 जुलै 1970 रोजी झाला, तर राष्ट्रवादीचे नेते अजित पवार यांचा जन्म 22 जुलै 1959 या दिवशी. दोघांनी 23 नोव्हेंबर 2019 रोजी शपथ घेतली होती, तर 26 नोव्हेंबर 2019 रोजी दोघांनी आपापल्या पदाचा राजीनामा दिला होता.

नेमकं काय घडलं?

महाराष्ट्राच्या राजकारणात हा ‘पहाटेचा शपथविधी’ म्हणून ओळखला जातो. देवेंद्र फडणवीस यांनी 23 नोव्हेंबर 2019 रोजी दुसऱ्यांदा मुख्यमंत्रिपदाचा पदभार स्वीकारला. मात्र शपथविधीची वेळ निवडली होती पहाटेची. मुख्यमंत्रिपदावरुन शब्द फिरवल्याचा दावा करत शिवसेनेने भाजपशी युती तोडली आणि राष्ट्रवादीसोबत सत्तास्थापनेची बोलणी सुरु केली. या हालचाली सुरु असतानाच अजित पवार यांच्या नेतृत्वात राष्ट्रवादी काँग्रेसच्या काही आमदारांच्या साथीने भाजपने सरकार स्थापन केलं.

अवघ्या तीन दिवसात फडणवीसांवर राजीनामा देण्याची नामुष्की ओढवली होती. याचं कारण म्हणजे अजित पवार यांनी पक्षाची हाक ऐकत मागे फिरण्याचा निर्णय घेतला. त्यांनी उपमुख्यमंत्रिपदाचा राजीनामा दिल्याने फडणवीसांचं सरकार औट घटकेचं ठरलं होतं. त्यामुळे बहुमत चाचणीत पराभव टाळण्यासाठी फडणवीस यांना देखील राजीनामा द्यावा लागला होता.

अवघा महाराष्ट्र साखरझोपेत असताना 23 नोव्हेंबर 2019 रोजी राज्याच्या राजकारणात मोठा भूकंप झाला.

दरम्यान, अजितदादांच्या वाढदिवसानिमित्त राष्ट्रवादीतर्फे कोविड योद्ध्यांच्या सन्मान कार्यक्रमाचं नियोजन करण्यात आलं आहे.

राज्याचे माननीय उपमुख्यमंत्री ना. अजितदादा पवार यांच्या वाढदिवसानिमित्त राष्ट्रवादी काँग्रेस पक्षाच्यावतीने कोरोना काळात अविरत काम करणाऱ्या कोविड योद्ध्यांचा प्रदेश कार्यालयात सन्मान करण्यात आला.@AjitPawarSpeaks @hemant_takle @JadhavRakhee #AjitPawar #ajitdadabirthday pic.twitter.com/tUYZIdaGbT

— NCP (@NCPspeaks) July 22, 2021

दुसरीकडे, अजित पवार यांनी देवेंद्र फडणवीसांना वाढदिवसाच्या शुभेच्छा दिल्या आहेत.

महाराष्ट्र विधानसभेचे विरोधी पक्षनेते @Dev_Fadnavis जी यांना वाढदिवसाच्या हार्दिक शुभेच्छा! आपल्याला निरोगी व दीर्घायुष्य लाभो हीच सदिच्छा!

— Ajit Pawar (@AjitPawarSpeaks) July 22, 2021

तर देवेंद्र फडणवीस यांच्या वाढदिवसानिमित्त भाजपनेही काही कार्यक्रम आयोजित केले आहेत.

मा.श्री. देवेंद्रजी फडणवीस यांच्या वाढदिवसानिमित्त नगरसेवक अमोल बालवडकर यांच्या माध्यमातून पुणे महापालिकेमध्ये नव्याने समाविष्ट झालेल्या सुस-म्हाळुंगे या गावांसाठी राबवण्यात येणाऱ्या प्रतिदिन २लक्ष लि.(रोज २० टँकर) शुद्ध पाणीपुरवठा या अभिनव उपक्रमाचे जलपूजन आणि वृक्षारोपण केले. pic.twitter.com/alpHBTY4FX

— Chandrakant Patil (@ChDadaPatil) July 22, 2021

संबंधित बातम्या :

चारित्र्य संपन्न, स्वच्छ प्रतिमा, मराठ्यांचा कैवारी; फडणवीसांच्या वाढदिवसानिमित्त संजय काकडेंची फेसबुक पोस्ट

“दोन हाणा, पण मला आपलं म्हणा” अजितदादांनी रुसवा धरलेल्या राष्ट्रवादी पदाधिकाऱ्याचा जाहीर माफीनामा

(Ajit Pawar Devendra Fadnavis share birthday on same day 22nd July has more coincidences)