कोथरुडमध्ये दोन चंद्रकांत यांच्यात टक्कर, मनसे फॅक्टर कोणाला फायदेशीर ?
पुण्यातील कोथरुड या हायप्रोफाईल मतदार संघातील विधानसभा निवडणूकीकडे सर्वांच लक्ष लागले आहे. या मतदार संघात दोन चंद्रकांत यांच्यात टक्कर होणार आहे. तर मनसेचा उमेदवारही असल्याने तिरंगी निवडणूकीचा कोणाला फायदा होणार याकडे लक्ष लागले आहे.
महाराष्ट्रात विधानसभा निवडणूकांची तयारी जोमाने सुरु आहे. जागा वाटपाचा तिढा सुटता-सुटता नाकीनऊ आले आहे. आता उमेदवारी अर्ज भरण्याची शेवटची तारीख 29 ऑक्टोबर रोजी होती. आता 4 नोव्हेंबर रोजी अर्ज मागे घेण्याचा दिवस आहे.येत्या 20 नोव्हेंबरला मतदान आहे तर 23 नोव्हेंबरला निकाल लागणार आहे. पुण्यातील कोथरुड विधानसभेत काय स्थिती आहे याची माहिती आज आपण घेणार आहोत.
कोथरुड विधानसभा – 2014
| उमेदवाराचे नाव | पक्ष | एकूण मते | टक्केवारी शेअर |
|---|---|---|---|
| कुलकर्णी मेधा विश्राम | भाजपा | 1,00,941 | 51.15% |
| चंद्रकांत बालभिम मोकाटे | शिवसेना | 36,279 | 18.38% |
| बाबुराव दत्तोबो चंदेरे | राष्ट्रवादी कॉंग्रेस | 28,179 | 14.28% |
कोथरुड विधानसभा मतदार संघ पुणे जिल्ह्यात येतो. साल 2008 मतदार संघाच्या फेररचनेनुसार तयार झालेला आहे. कोथरुड विधानसभा मतदार संघात पुणे महानगर पालिकेचे वॉर्ड क्रमांक 43 पासून 58, 161 आणि 162 सामील आहेत. कोथरुड विधानसभा क्षेत्र पुणे लोकसभा मतदार संघात येतो. भारतीय जनता पार्टीचे चंद्रकांत ( दादा ) बच्चू पाटील येथील विद्यमान आमदार आहेत. या मतदार संघातून साल 2009 मध्ये शिवसेनेचे चंद्रकांत मोकाटे यांचा विजय झाला होता. त्यानंतर मात्र या मतदार संघात सलग दोन टर्म भाजपाचे आमदार निवडून येत आहे. साल 2019 च्या निवडणूकात येथून चंद्रकांत पाटील यांचा विजय झाला होता.
कोथरुड विधानसभा – 2019
| उमेदवाराचे नाव | पक्ष | एकूण मते | टक्केवारी शेअर |
|---|---|---|---|
| चंद्रकांत (दादा) बचू पाटील | भाजपा | 1,05,246 | 53.93 % |
| किशोर नाना शिंदे | मनसे | 79,751 | 40.87 % |
| नोटा | इतर | 4,028 | 2.06 % |
जातीय समीकरण काय ?
कोथरुड विधानसभा मतदार संघ हा खुला जनरल वर्गवारीचा मतदार संघ आहे.साल 2019 च्या आकड्यांनुसार येथे एकूण 3 लाख 90 हजार 458 मतदार आहेत.या मतदार संघात एससी – एसटी मतदारांची संख्या महत्वाची आहे. येथील एससी आणि एसटी मतदारांची संख्या 37 हजाराच्या आसपास आहे. तर येथे मुस्लीमांची लोकसख्या 9 हजाराच्या आसपास आहे.महायुतीने कोथरुड येथून विद्यमान आमदार चंद्रकांत पाटील यांना उमेदवारी दिलेली आहे. सध्या चंद्रकांत पाटील सत्तेत मंत्री आहेत. भाजपाने त्यांना पुन्हा एकदा संधी दिलेली आहे.महाविकास आघाडीतील ठाकरे गटाचे चंद्रकांत मोकाटे येथून उमदेवार म्हणून उभे राहीले आहेत.
मनसे फॅक्टर कोणाला फायदेशीर
कोथरुड हा मतदार संघ हायप्रोफाईल गणला जात आहे. भाजपाचे चंद्रकांत पाटील येथून उभे आहेत. ते सरकारमध्ये उच्च आणि तंत्रशिक्षण मंत्री आहेत. येथे भाजपाचे दोन खासदार आहेत. केंद्रीय राज्यमंत्री मुरलीधर मोहोळ आणि दुसऱ्या खासदार प्रा.डॉ. मेधा कुलकर्णी आहेत. येथे भाजपाचे अनेक नगरसेवक आहेत. दुसऱ्याबाजूला दहा वर्षांपूर्वी आमदार म्हणून निवडून आलेल्या चंद्रकांत मोकोटे यांना ठाकरे गटाने उमेदवारी दिलेली आहे. साल 2019 च्या निवडणूकीत चंद्रकांत पाटील यांच्या विरोधात सर्वपक्षीय उमेदवार होऊन 80 हजार मते मिळविणारे किशोर शिंदे यांना महाराष्ट्र नवनिर्माण सेनेने उमेदवारी दिलेली आहे. त्यामुळे येथे तिरंगी सामना होणार आहे. यात शिंदे यांनी गेल्यावेळी घेतलेली मते घेतली तरी मोकाटे अडचणीत येण्याची शक्यता आहे. नाही घेतली तर पाटील अडचणीत येतील आणि दोघांत मतांची विभागणी झाली तर पाटील निवडून येथील असे येथील चित्र आहे. यातून पाटील यांचा फायदा होण्याची शक्यता आहे. त्यामुळे मनसे फॅक्टर येथे कोणाला फायदेशीर ठरणार याकडे लक्ष लागले आहे.
