कोल्हापूरकरांनी जे ठरवलं, तेच केलं, सेनेचे दोन खासदार निवडले, सर्व आमदार पाडले!

Kolhapur assembly results 2019 कोल्हापूर : महाराष्ट्र विधानसभा निवडणुकीच्या निकालात मोठे उलटफेर पाहायला मिळत आहेत. अनेक ठिकाणी आश्चर्यकारक तर बहुतेक ठिकाणी एक्झिट पोलमध्ये प्रतिबिंबित केलेले निकाल पाहायला मिळाले. राज्यापेक्षा नेहमीच वेगळा निकाल देणाऱ्या कोल्हापूर जिल्ह्याने यंदाही ठरवल्याप्रमाणेच केलेलं दिसतंय. कारण लोकसभेला आमचं ठरलंय म्हणत, शिवसेनेला दोन खासदार देणाऱ्या कोल्हापूरकरांनी (Kolhapur assembly results 2019) जिल्ह्यातील सेनेचे जवळपास सर्व आमदार पाडल्याचं चित्र आहे.

कोल्हापूर जिल्ह्यात दोन खासदार आहेत. दोन्हीही जागा यंदा शिवसेनेने जिंकल्या. तर कोल्हापूर जिल्ह्यात विधानसभेचे एकूण 10 मतदारसंघ आहेत. 2014 मध्ये त्यापैकी 6 शिवसेनेकडे, 2 भाजपकडे आणि 2 राष्ट्रवादी काँग्रेसकडे होत्या. म्हणजे मोदींनी घोषणा केल्याप्रमाणं कोल्हापूर जिल्हा हा काँग्रेसमुक्त झाला. कोल्हापूर महापालिका सोडली तर सर्वच ठिकाणी शिवसेना-भाजपनं सत्ता स्थापन केली.

मात्र कोल्हापूर जिल्ह्याची धुरा काँग्रेस आमदार सतेज पाटील यांनी आपल्या हाती घेतली आणि यंदाच्या निवडणुकीत जिल्ह्याचं चित्र पालटलं. शिवसेनेचे 6 पैकी 5 आमदार हरले आहेत. राधानगरीतील प्रकाश आबिटकर हे एकमेव आमदार टफ फाईट देत होते. त्यांच्या विरोधात राष्ट्रवादीचे माजी आमदार के पी पाटील लढत झाली. यात आबिटकर यांनी बाजी मारली. त्यामुळे शिवसेनेच्या 6 पैकी केवळ एकच आमदार आपली जागा वाचवू शकला.

2014 मध्ये शिवसेनेकडून निवडून आलेल्यांमध्ये कोल्हापूर उत्तरमधून राजेश क्षीरसागर, हातकणंगलेतून सुजीत मिणचेकर, शाहूवाडीतून सत्यजीत पाटील सरुडकर, शिरोळमधून उल्हास पाटील आणि करवीरमधून चंद्रदीप नरके या विद्यमान आमदारांचा पराभव झाला आहे.

कोल्हापूर उत्तर काँग्रेसचे चंद्रकांत जाधव, हातकणंगलेतून काँग्रेसचे राजीव आवळे, शिरोळमध्ये राजेंद्र यड्रावकर अपक्ष, शाहूवाडीत जनसुराज्य शक्तीचे विनय कोरे आणि करवीरमध्ये काँग्रेसचे पी एन पाटील यांचा विजय झाला.

कोल्हापुरातील विजयी उमेदवार

1. इचलकरंजी –  प्रकाश आवडे, अपक्ष उमेदवार, भाजपचे सुरेश हाळवणकर पराभूत
2. कोल्हापूर दक्षिण – विजयी ऋतुराज पाटील- काँग्रेस, भाजपचे अमल महाडिक पराभूत
3. कोल्हापूर उत्तर – विजयी चंद्रकांत जाधव – काँग्रेस, शिवसेनेचे राजेश क्षीरसागर पराभूत
4. राधानगरी-भुदरगड – विजयी प्रकाश आबिटकर, शिवसेना, राष्ट्रवादीचे के पी पाटील पराभूत
5. शाहूवाडी – विजयी विनय कोरे, जनसुराज्य पक्ष,  शिवसेनेचे सत्यजित आबा पाटील पराभूत
6. करवीर – पी एन पाटील, विजयी,  काँग्रेस, चंद्रदीप नरके पराभूत, शिवसेना
7. हातकणंगले- राजू आवळे, विजयी  काँग्रेस. शिवसेनेचे सुजित मिणचेकर, पराभूत
8. शिरोळ – राजेंद्र पाटील- यड्रावकर, विजयी, अपक्ष, उल्हास पाटील, शिवसेना आमदार पराभूत
9. चंदगड –
10. हसन मुश्रीफ, राष्ट्रवादी- कागल विजयी, संजय घाटगे पराभूत