‘दावोसच्या गुलाबी थंडीत तुम्ही काय केलत?’ शितल म्हात्रे यांच्या प्रश्नाला प्रियंका चतुर्वेदी यांचं प्रत्युत्तर

शिवसेना ठाकरे गटाच्या नेत्या प्रियंका चतुर्वेदी यांनी मुख्यमंत्री एकनाथ शिंदे आणि खासदार श्रीकांत शिंदे यांच्यावर केलेल्या टीकेमुळे मुंबईतलं राजकीय वातावरण तापलं आहे. विशेष म्हणजे चतुर्वेदी यांच्या टीकेनंतर शिवसेनेच्या शिंदे गटाच्या नेत्या शितल म्हात्रे यांच्याकडून प्रियंका चतुर्वेदी यांच्यावर चांगलाच शाब्दिक प्रहार केला जातोय. प्रियंका चतुर्वेदी यांनी महाविकास आघाडीचे उत्तर पूर्व मुंबई मतदारसंघाचे उमेदवार संजय दीना पाटील यांच्यासाठी आयोजित प्रचारसभेत एकनाथ शिंदे आणि श्रीकांत शिंदे यांच्यावर टीका केली. प्रियंका चतुर्वेदी “एकनाथ शिंदे कोण आहेस तू? कोण आहेस तू?” म्हणून मोठ्याने ओरडत होत्या. समोरची गर्दी “गद्दार, गद्दार” अशी ओरडत होती. “ठाण्यापर्यंत हा आवाज पोहोचला पाहिजे. गद्दार गद्दारच राहणार”, असं प्रियंका चतुर्वेदी यावेळी म्हणाल्या.

यावेळी प्रियंका चतुर्वेदी यांनी ‘दीवार’ चित्रपटाचा उल्लेख केला. “दीवार सिनेमात अमिताभ बच्चन त्याचा हात दाखवतो, ‘मेरा बाप चोर हैं’ असं त्यावर लिहिलेलं असतं, तसंच श्रीकांत शिंदेंच्या कपाळावर लिहिलय, ‘मेरा बाप गद्दार हैं’”, अशी टीका प्रियंका चतुर्वेदी यांनी केली. या टीकेनंतर शितल म्हात्रे यांनी अतिशय खोचक शब्दांत प्रियंका चुतर्वेदी यांच्यावर टीका केली.

शितल म्हात्रे काय म्हणाल्या?

शितल म्हात्रे यांनी ‘एक्स’वर (ट्विटर) व्हिडीओ ट्विट करत निशाणा साधलाय. “तुमचा काहीच संबंध नसताना दावोसला गुलाबी थंडीत तुम्ही काय केलं? हे जरा तुम्ही लोकांना सांगा”, अशी टीका शितल म्हात्रे यांनी केली. “प्रिय चतुर ताई, आपण खासदारकी कशी मिळवली आहे हे खरंतर तुम्ही लोकांना सांगितलं पाहिजे. कारण मराठीचा गंध नसताना, कुठलंही कर्तृत्व नसताना, शिवसेनेशी संबंध नसताना देखील आपण खासदारकी मिळवलीत. आता खासदारकीची टर्म संपत आल्यानंतर आपली जी तडफड चालली आहे हे आपल्या वक्तव्यातून दिसत आहे. खरंतर बुलंदी मधला एक डायलॉग तुम्हाला कदाचित माहिती नसेल. बिल्ली के दात गिरे नहीं, चली शेर के मुँह में हात डालने, अशीच काहीतरी तुमची परिस्थिती झालेली आहे”, अशीदेखील टीका शितल म्हात्रे यांनी केली.

“आपल्याला परत खासदारकी मिळावी यासाठी तुम्ही गेल्या आठवड्यात कुणाकुणाला भेटलात आणि माझ्याकडे आदित्यचे कसे फोटोग्राफ आहेत हे दाखवून तरी मला खासदारकी द्या, असं सांगणाऱ्या तुम्ही, तेव्हा तुम्ही कुणाला बोलताय याचा जरा विचार करा आणि भान ठेवा”, अशा शब्दांत शितल म्हात्रे यांनी चतुर्वेदी यांना ठणकावलं. तर शितल म्हात्रे यांच्या टीकेला प्रियंका चतुर्वेदी यांनीदेखील सडेतोड प्रत्युत्तर दिलं.

प्रियंका चतुर्वेदी यांचं प्रत्युत्तर काय?

“मी कधीच दावोसला गेली नाही! पण मी एक दिवस नक्कीच जाईन. गद्दार सेनेच्या या मंदबुद्धी महिलेने हे सिद्ध केले आहे की त्या फक्त गद्दार नाहीत तर खोट्या आहेत. आता पुन्हा रडायला जा, तुझे अश्रू पुसण्यासाठी टिश्यू नाहीत. तथापि, दावोसबद्दल बोलायचे झाले तर, गेल्या वर्षी तुमचे ठाण्याची राजपुत्र कसे होते? ते कोणत्या अधिकाऱ्याने अधिकाऱ्यांच्या बैठका घेत होते? कदाचित परराष्ट्र मंत्रालयाचे प्रवक्ते तपशील शेअर करु शकतील”, असं प्रत्युत्तर प्रियंका चतुर्वेदी यांनी दिलं.

I have never been to Davos! But I shall certainly go someday. These dimwit women of Gaddar Sena have proven that they aren’t just gaddar but are liars to boot. Now go start crying again, don’t have a tissue to spare for you’ll to wipe your tears 😀

— Priyanka Chaturvedi🇮🇳 (@priyankac19) May 9, 2024

आता या प्रकरणावर आणखी काय-काय आरोप-प्रत्यारोप केले जातात, ते पाहणं देखील महत्त्वाचं ठरणार आहे.