तर मी तुरुंगातून सुद्धा लोकसभेची निवडणूक लढवेल, रविकांत तुपकर कडाडले

गणेश सोळंकी, टीव्ही 9 मराठी, प्रतिनिधी, बुलढाणा | 7 फेब्रुवारी 2024 : शेतकऱ्यांसाठी वारंवार आंदोनल छेडणारे शेतकरी नेते रविकांत तुपकर यांनी आता वेळ पडली तर तुरुंगातून लोकसभा निवडणूक लढविण्याचा इरादा व्यक्त केला आहे. शेतकऱ्यांचे आंदोलन करताना जिल्ह्यातील प्रशासनाशी त्यांचे वारंवार खटके उडत आहेत. त्यांच्यावर आंदोलन प्रकरणात गुन्हा दाखल झाला असून त्यांची जामीन रद्द व्हावा यासाठी सरकारने कोर्टात अर्ज केला आहे. त्यापार्श्वभूमीवर त्यांनी जर आपल्याला अटक झाली तर शेतकऱ्यांच्या न्याय हक्कासाठी आपण रक्ताचा शेवटचा थेंब शिल्लक असेपर्यंत लढणार असून त्यासाठी तुरुंगातूनही निवडणूक लढवू असा इशारा रविकांत तुपकर यांनी दिला आहे.

सत्ताधाऱ्यांनी जर मला तुरुंगात टाकलं, तर मी तुरुंगातूनही लोकसभेची निवडणूक लढवणार म्हणजे लढवणारच, शेतकऱ्यांच्या न्याय हक्कासाठी रक्ताच्या शेवटच्या थेंबापर्यंत मी लढणार आहे अशी घोषणाच आज रविकांत तुपकर यांनी केली आहे. गेल्या काही दिवसापासून रविकांत तुपकर आणि जिल्ह्यातील सत्ताधारी नेत्यांमध्ये शाब्दीक चकमकी उडत आहेत, त्या पार्श्वभूमीवर रविकांत तुपकर यांनी ही घोषणा केली आहे. शेतकरी नेते रविकांत तुपकर यांना पोलिसांनी नोटीस दिली आहे. या त्यांना न्यायालयात हजर राहण्यास सांगितले आहे. पोलिसांनी न्यायालयात अर्ज दाखल केला आहे. या अर्जात तुपकर यांचा जामीन अर्ज रद्द करावा आणि त्यांना तुरुंगात टाकावे असे पोलिसांनी म्हटले आहे. त्यामुळे कोर्टात काय निर्णय होणार याकडे जिल्हावासीयांचे नव्हे तर राज्याचे लक्ष लागले आहे.

रविकांत तुपकर यांना धमकी

शिंदे गटाचे आमदार संजय रायमुलकर यांचा एका सभेत बोलताना तोल गेला. रायमुलकर यांनी शेतकरी नेते रविकांत तुपकर यांना सभेत घुसून कानाखाली मारण्याची भाषा केली होती. रविकांत तुपकर सध्या जिल्ह्यात एल्गार परिवर्तन मेळावे घेत आहेत, गावोगावी जाऊन शेतकरी, शेतमजूर आणि सर्वसामान्य नागरिकांशी चर्चा करीत आहे. तसेच त्यांच्याकडून लोकसभा लढविण्यासाठी मोठा निधी देखील उभा करीत आहेत.