कल्याणचा खासदार होण्यासाठी मनसेची मदत घ्यावीच लागेल; राजू पाटलांचा श्रीकांत शिंदेंना सूचक इशारा

मुंबई : काही दिवसांपूर्वीच मनसे आणि शिंदे गटामध्ये पोस्टर वॉर रंगल्याचं पहायला मिळालं होतं. रस्त्याच्या रखडलेल्या कामावरून मनसेने (MNS) पोस्टर उभारत शिंदे गटावर निशाणा साधला होता. त्यानंतर शिंदे गटाकडून देखील मनसेच्या पोस्टरला जोरदार प्रत्युत्तर देण्यात आलं होतं. आता पुन्हा एकदा मनसे आणि शिंदे गट आमने-सामने आल्याचं पहायला मिळत आहे. कल्याणचा पुढचा खासदार मनसेच्या मदतीशिवाय होऊ शकत नाही, असा सूचक इशारा मनसे आमदार राजू पाटील (Raju Patil) यांनी खासदार श्रीकांत शिंदे (Shrikant Shinde) यांना दिला आहे. तसेच त्यांनी घराणेशाहीवरून मुख्यमंत्री एकनाथ शिंदे यांना देखील टोला लगावला आहे. शिंदे गटात घराणेशाही नवीन नसल्याचं राजू पाटील यांनी म्हटलं आहे.

काय म्हणाले राजू पाटील?

राजू पाटील यांनी शिंदे गटावर पुन्हा एकदा जोरदार घणाघात केला आहे. कल्याणचा पुढचा खासदार मनसेच्या मदतीशिवाय होऊ शकणार नाही, असा सूचक इशारा त्यांनी कल्याणचे खासदार श्रीकांत शिंदे यांना दिला आहे. तसेच शिंदे गटात घराणेशाही नवीन नसल्याचे म्हणत त्यांनी मुख्यमंत्री एकनाथ शिंदे यांना देखील टोला लगावला आहे.

मी आमदारकीला देखील उभं राहात नव्हतो, मात्र राजसाहेब म्हटले म्हणून आमदारकीची निवडणूक लढवली. ते उद्या म्हटले खासदारकीची निवडणूक लढव तर तीही मी लढवेल. मात्र आम्ही तेव्हाच जाहीर केलं होत लोकसभा निवडणूक लढवायची नाही. परंतु भविष्यात कल्याणचा जोही कोणी खासदार होईल मग तो मनसेचा असेल किंवा इतर कुठल्याही पक्षाचा त्याला मनसेची दखल घ्यावीच लागेल असं राजू पाटील यांनी म्हटलं आहे. राजू पाटील यांच्या या टीकेमुळे पुन्हा एकदा राजकीय वातावरण तापण्याची शक्यता आहे.