पुतण्याने भाजपची साथ सोडताच चुलत्याचं मोठं विधान; म्हणाले, आम्हाला ईडीची…
भाजपचे नेते धैर्यशील मोहिते पाटील यांनी भाजपला जोरदार धक्का दिला आहे. मोहिते पाटील हे शऱद पवार गटात जाणार असून निवडणूक लढणार आहेत. आंबेडकर जयंतीच्या दिवशी मोहिते पाटील यांचा पवार गटात प्रवेश होईल. त्यानंतर दुसऱ्याच दिवशी ते शरद पवार यांच्या उपस्थितीत उमेदवारी अर्ज दाखल करणार असून त्याच दिवसापासून प्रचाराला सुरुवात करणार आहेत.
भाजपचे नेते धैर्यशील मोहिते पाटील यांनी भाजपला सोडचिठ्ठी दिली आहे. धैर्यशील मोहिते पाटील हे शरद पवार यांच्या नेतृत्वातील राष्ट्रवादीत जाणार आहे. ऐन लोकसभा निवडणुकीच्या रणधुमाळीत इनकमिंग सुरू असताना भाजपला मोठा धक्का बसला आहे. त्यामुळे पश्चिम महाराष्ट्रात भाजपला मोठा फटका बसणार असून शरद पवारांच्या राष्ट्रवादीला मोठं बळ मिळणार आहे. धैर्यशील मोहिते पाटील यांनी मोठा निर्णय घेतल्यानंतर त्यांचे चुलते जयसिंह मोहिते पाटील यांनी मोठं विधान केलं आहे. आम्हाला कोणत्याही ईडीची भीती नाही, असं जयसिंह मोहिते पाटील यांनी म्हटलं आहे.
धैर्यशील मोहिते पाटील यांनी भाजपला सोडचिठ्ठी देण्याचा निर्णय घेतल्यानंतर जयसिंह मोहिते पाटील यांनी मोठं विधान केलं आहे. आम्हाला कोणत्याही ईडीची भीती नाही. आमच्या सर्व संस्था व्यवस्थित सुरू आहेत. पण देवेंद्र फडणवीस यांनी आमच्याशी संपर्क साधला असता तर ही वेळ आली नसती, असं जयसिंह मोहिते पाटील यांनी म्हटलं आहे.
गुलाल आघाडीचाच
सुमित्रा पतसंस्थेचे एक हजार कोटी रुपये गेल्या दहा वर्षात परत केले आहेत. आमच्या सर्व संस्था सुरळीत सुरू आहेत. त्यामुळे आम्हाला कुठल्या ईडीची कुठल्या पक्षाची भीती नाही. आता माढा लोकसभेच्या गुलालासोबत सोलापूर आणि बारामतीचा गुलालही महाविकास आघाडीचाच असणार आहे, असंही त्यांनी सांगितलं.
आंबेडकर जयंतीला प्रवेश
रणजितसिंह मोहिते पाटील यांना राष्ट्रवादीत येऊ नका असे आम्ही सांगितले आहे. भाजपने त्यांना खूप मदत केली आहे. 14 एप्रिलला फक्त धैर्यशील मोहिते पाटील राष्ट्रवादीत प्रवेश करणार आहेत. 16 एप्रिल रोजी शरद पवार यांच्या उपस्थितीत उमेदवारी अर्ज भरून अकलूज येथे प्रचार सभा घेणार आहेत. कारखान्याला केलेली मदत ही देणगी नसून कर्ज आहे. ही निवडणूक जनतेने हातात घेतलेली आहे, असं त्यांनी स्पष्ट केलं.
दरम्यान, धैर्यशील मोहिते पाटील यांच्या या निर्णयावर भाजपचे माढा लोकसभेचे सहप्रभारी संतोष पाटील यांनी प्रतिक्रिया व्यक्त केली आहे. मोहिते पाटलांनी शरद पवार गटात जाण्याचा निर्णय घेणं त्यांच्यासाठी मारक आहे. धैर्यशील मोहिते पाटील यांच्या शरद पवार गटात जाण्याला भाजप आमदार रणजितसिंह मोहिते पाटील यांचा विरोध. मोहिते पाटील महाविकास आघाडीकडून निवडणूक लढवल्यास त्यांना गृहकलहाचा सामना करावा लागू शकतो, अशी प्रतिक्रिया माढा लोकसभेचे सहप्रभारी संतोष पाटील यांनी व्यक्त केली आहे.
