Aman Sehrawat : अमनच पण विनेशसारखं झालेलं, 10 तासात त्याने कसं कमी केलं 4.5 किलो वजन

भारताचा अवघ्या 21 वर्षांचा कुस्तीपटू अमन सेहरावतने पॅरिस ऑलिम्पिकमध्ये शुक्रवारी रात्री इतिहास रचला. अमनने 57 किलो वजनी गटात ब्रॉन्झ मेडल मिळवलं. अमनने या सामन्यात पुर्तो रिकोच्या कुस्तीपटूवर एकतर्फी 13-5 असा विजय मिळवला. अमनच्या विजयानंतर एक खुलासा झाला आहे. रिपोर्ट्सनुसार अमन सेहरावतच वजन सुद्धा विनेश फोगाट सारख वाढलं होतं.

अमन सेहरावतच सेमीफायनलमध्ये पराभव झाला, त्यावेळी त्याचं वजन 4.5 किलो जास्त होतं. पण अमन आणि सपोर्ट स्टाफने मिळून ब्रॉन्झ मेडल मॅचआधी हे वाढलेलं वजन कमी केलं. जपानी कुस्तीपटूविरोधात सेमीफायनल मॅच हरल्यानंतर अमनच वजन करण्यात आलं. वजन 61.5 किलो होतं. अमन 57 किलो वजनी गटात खेळतोय.

हातात फक्त 10 तास

4.5 किलो वजन जास्त होंत. त्यानंतर कोच जागमंदर सिंह आणि वीरेंद्र दहिया यांनी एकूण 6 सदस्यीय टीमसोबत मिळून अमनच वजन कमी करण्याच मिशन सुरु केलं. त्यांच्या हातात फक्त 10 तास उरलेले.

अमनने वजन कमी करण्यासाठी काय-काय केलं?

अमन सेहरावतकडून आधी दीड तास मॅट सेशन करुन घेतलं. यात त्याला उभं राहून रेसलिंग करायला लावली.

त्यानंतर अमन सेहरावतने एक तासात हॉट बाथ सेशन केलं.

रात्री 12 वाजल्यानंतर अमनने जीममध्ये 1 तास ट्रेडमिल मशीनवर रनिंग केली.

अमनला विश्रांतीसाठी फक्त अर्ध्या तासाची वेळ देण्यात आली. त्यानंतर 5-5 मिनिटांचे सौना बाथचे 5 सेशन दिले. अशा प्रकारे त्याचं वजन 3.6 किलो कमी झालं.

अखेरीस अमनला मसाज थेरपी देण्यात आली. त्यानंतर त्याने हलकी जॉगिंग केली आणि 15 मिनिटांच रनिंग सेशन.

इतक्या मेहनतीनंतर सकाळी 4.30 वाजता अमनच वजन 56.9 किलो भरलं. म्हणजे मर्यादेपेक्षा 100 ग्रॅम कमी होतं.

विनेश फोगाटच्या बाबतीतही हेच झालं. 50 किलो वजनी गटात 100 ग्रॅम जास्त वजन भरल्याने तिला फायनल खेळता आली नाही. त्याशिवाय तिच हक्काच मेडलही गेलं.