T20 World Cup 2026 : ऑस्ट्रेलियाचं टी20 वर्ल्डकप स्पर्धेतील स्वप्न भंगलं, झिम्बाब्वेची सुपर 8 फेरीत धडक

टी20 वर्ल्डकप स्पर्धेतील ग्रुप ब मध्ये आतापर्यंतचा सर्वात मोठा उलटफेर पाहायला मिळाला आहे. या गटात सर्वाधिक धक्कादायक निकाल लागले आहेत. या गटात ऑस्ट्रेलिया, श्रीलंका, झिम्बाब्वे, आयर्लंड आणि ओमान हे संघ आहेत. त्यामुळे या गटातून स्पर्धेपूर्वी ऑस्ट्रेलिया आणि श्रीलंका या संघांना पसंती दिली गेली होती. पण प्रत्यक्षात या गटात वेगळंच घडलं. कोणाच्या ध्यानीमनी नसेल असा निकाल या गटात लागला. दुबळ्या समजल्या जाणाऱ्या झिम्बाब्वेने ऑस्ट्रेलियाला पराभवाची धूळ चारली आणि गटातील चित्र बदललं. त्यानंतर श्रीलंकेने ऑस्टेलियाला पराभूत केलं आणि कांगारूंचा पाय आणखी खोलात गेला. त्यामुळे ऑस्ट्रेलियाचं गणित जर तर वर आलं होतं. झिम्बाब्वे उर्वरित दोन्ही सामन्यात पराभूत झाली तर ऑस्ट्रेलियासाठी थोड्याफार आशा होत्या. मात्र ऑस्ट्रेलियाच्या आशेवर पावसाचं पाणी पडलं. कारण झिम्बाब्वे आणि आयर्लंड सामना पावसामुळे होऊ शकला नाही. त्यामुळे ऑस्ट्रेलियाला शेवटचा सामना खेळण्यापूर्वीच स्पर्धेतून गाशा गुंडाळावा लागला आहे. 2009 मध्ये ऑस्ट्रेलियाचं आव्हान साखळी फेरीत संपुष्टात आलं होतं.

…म्हणून झिम्बाब्वेची सुपर 8 फेरीत धडक

टी20 वर्ल्डकप 2026 स्पर्धेत झिम्बाब्वे आणि आयर्लंड सामना पावसामुळे रद्द झाल्याने दोन्ही संघांना प्रत्येकी 1 गुण दिला आहे. त्यामुळे झिम्बाब्वेला थेट सुपर 8 फेरीचं तिकीट मिळालं आहे. पाऊस थांबवण्याचं नाव घेत नसल्याने कटऑफ टाईम असलेल्या संध्याकाळी 6.10 पर्यंत होतं. पण तिथपर्यंत वाट पाहण्यात काहीच अर्थ नव्हता. पंचांनी दोन्ही कर्णधारांशी चर्चा केली. त्यानंतर हा सामना ड्रॉ झाल्याचं घोषित केलं. यासह झिम्बाब्वेच्या खात्यात 5 गुण जमा झाले आहे. त्यामुळे या गटातून श्रीलंकेनंतर झिम्बाब्वेने एन्ट्री मारली आहे. कारण शेवटच्या सामन्यात ऑस्ट्रेलियाने विजय मिळवला तरी 4 गुण होतील. तर आयर्लंड, ऑस्ट्रेलिया आणि ओमान यांचं स्पर्धेतील आव्हान संपुष्टात आलं आहे. सुपर 8 फेरीत जागा मिळवणारा झिम्बाब्वे हा सातवा संघ ठरला आहे.

पाकिस्तान की अमेरिका

अ गटातून भारताने सुपर 8 फेरीत धडक मारली आहे. आता पाकिस्तान आणि अमेरिका यापैकी कोणाला संधी मिळते याची उत्सुकता आहे. पाकिस्तान आणि नामिबिया सामन्यावर हे अवलंबून आहे. या सामन्यात नामिबियाने विजय मिळवला तर अमेरिकेला संधी मिळेल. पण पाकिस्तानने हा सामना जिंकला किंवा पावसामुळे रद्द झाला. तर पाकिस्तानला संधी मिळेल. आता या सामन्याकडे क्रीडाप्रेमींचं लक्ष लागून आहे.