PAK vs NAM : नामिबियाविरूद्ध पाकिस्तान संघात 5 खेळाडू वगळता सर्व नवे चेहरे, जाणून घ्या कसं ते
T20 World Cup 2026 : पाकिस्तानने भारताविरूद्धचा सामना 61 धावांनी गमावला आणि पुढचं गणित बिघडलं. आता पाकिस्तानला काहीही करून नामिबियाविरुद्धचा सामना जिंकणं भाग आहे. अन्यथा स्पर्धेतील आव्हान संपुष्टात येईल. असं असताना नामिबियाविरुद्ध या वेळी पाच खेळाडू वगळता सर्व चेहरे नवीन आहेत.
टी20 वर्ल्डकप 2026 स्पर्धेतील साखळी फेरीचे सामने अंतिम टप्प्यात आहे. या स्पर्धेत सर्वात मोठा उलटफेर हा झिम्बाब्वे ऑस्ट्रेलिया सामन्यात पाहायला मिळाला. त्यामुळे आता ऑस्ट्रेलिया या स्पर्धेतून बाद होण्याच्या वेशीवर आहे. दुसरीकडे, पाकिस्तानची स्थितीही अशीच आहे. भारताविरूद्धच्या सामन्यात पाकिस्तानचा दारूण पराभव झाला. भारताने पाकिस्तानला 61 धावांनी पराभवाची धूळ चारली. त्यामुळे पाकिस्तानचे 2 गुण तर गेलेच, पण नेट रनरेटची पुरती वाट लागली आहे. त्यामुळे पाकिस्तानला शेवटच्या सामन्यात काहीही विजय मिळवावा लागेल. सुपर 8 फेरीसाठी पाकिस्तानला नामिबियाविरूद्धच्या सामन्यात विजय महत्त्वाचा आहे. टी20 वर्ल्डकप स्पर्धेच्या इतिहासात पाकिस्तान आणि नामिबिया दुसऱ्यांदा भिडणार आहेत. यापूर्वी वर्ल्डकप 2021 मध्ये आमनेसामने आले होते. तेव्हाच्या संघात असलेले पाच खेळाडू आताही आहेत. तर दहा नवे चेहरे आहेत.
टी20 वर्ल्डकप 2021 स्पर्धेत पाकिस्तानने नामिबियाला 45 धावांनी पराभूत केलं होतं. तेव्हा कर्णधारपदाची धुरा बाबर आझमच्या खांद्यावर होती. तेव्हाच्या संघात खेळलेले पाच खेळाडू आताही संघात असणार आहे. या व्यतिरिक्त इतर 10 खेळाडू पहिल्यांदा नामिबियाविरुद्ध खेळणार आहेत. बाबर आझमसह फखर जमान, मोहम्मद नवाज, शादाब खान आणि शाहीन शाह आफ्रिदी हे नामिबियाविरुद्ध खेळले आहे. तर साहिबजादा फरहान, ख्वाजा नफाय, उस्मान खान, सलमान आगा, फहीम अश्रफ, सईम आयूब, अबरार अहमद, नसीम शाह, सलमान मिर्जा आणि उस्मान तारीक हे दहा चेहरे नवीन आहेत. नामिबियाविरुद्धच्या सामन्यात काही बदल पाहायला मिळू शकतात. या सामन्यात बाबर आझम आणि शाहीन शाह आफ्रिदीला आराम दिला जाऊ शकतो. तर फखर जमान आणि नसीम शाहला प्लेइंग 11मध्ये स्थान मिळू शकते.
नामिबियाचा संघ या स्पर्धेतून आऊट आहे. त्यामुळे नामिबियासाठी हा औपचारिक सामना आहे. कारण आतापर्यंत खेळलेल्या तीन सामन्यात पराभवाचं तोंड पाहिलं आहे. त्यामुळे पाकिस्तानविरुद्धचा सामना जिंकून शेवट गोड करण्याचा प्रयत्न असेल. नामिबियाने हा सामना जिंकला तर पाकिस्तानचा शेवट कटू होईल. कारण त्यांना या स्पर्धेतून गाशा गुंडाळावा लागणार आहे. कारण अमेरिकेचा नेट रनरेट हा पाकिस्तानपेक्षा चांगला आहे. त्यामुळे पाकिस्तानला हा सामना जिंकणं भाग आहे.
