ENG vs IND : पहिल्या टेस्टसाठी प्लेईंग ईलेव्हन जाहीर, तिघांचा पत्ता कापला

इंग्लंड विरुद्ध टीम इंडिया यांच्यातील कसोटी मालिकेसाठी आता काही तासांचा अवधी बाकी आहे. उभयसंघात एकूण 5 कसोटी सामने खेळवण्यात येणार आहेत. मालिकेतील सलामीचा सामना हा 20 जूनपासून हेडिंग्ले लीड्स येथे आयोजित करण्यात आला आहे. शुबमन गिल याच्याकडे भारतीय संघाची धुरा आहे. तर बेन स्टोक्स इंग्लंडचं नेतृत्व करणार आहे. दोन्ही संघांनी सलामीच्या सामन्यासाठी जोरदार सराव केला आहे. मात्र इंग्लंडने प्लेइंग ईलेव्हन जाहीर करत आघाडी घेतली आहे. इंग्लंड क्रिकेट बोर्डाने 18 जून रोजी पहिल्या सामन्यासाठी अंतिम 11 खेळाडूंची नावं जाहीर केली आहेत. याबाबतची माहिती सोशल मीडियावरुन देण्यात आली आहे.

इंग्लंडने 4 जून रोजी पहिल्या कसोटीसाठी 14 खेळाडूंची नावं जाहीर केली होती. त्यामुळे प्लेइंग ईलेव्हनमध्ये कोणत्या 11 खेळाडूंना संधी मिळणार? याकडे टीम इंडियाचंही लक्ष होतं. अखेर सामन्याच्या 48 तासांआधी अंतिम 11 खेळाडूंची नावं समोर आली आहेत. तर 3 प्रमुख खेळाडूंचा पत्ता कट करण्यात आला आहे. इंग्लंड अंतिम 11 खेळाडूंमध्ये 3 वेगवान गोलंदाज आणि 1 स्पेशालिस्ट स्पिनरचा समावेश करण्यात आला आहे. इंग्लंडने जेकब बेथल, जेमी ओव्हरटन आणि सॅम कूक या तिघांना बाहेर ठेवलं आहे.

खेळपट्टी कुणाचा खेळ करणार?

मीडिया रिपोर्ट्सनुसार, इंग्लंड टीमने लीड्स येथे हिरव्या खेळपट्टीऐवजी फलंदाजीसाठी मदतशीर पीच तयार करावी, अशी मागणी केली आहे. मात्र इंग्लंडची प्लेइंग ईलेव्हन पाहून तसं वाटत तरी नाही, त्याचं कारण 4 स्पेशालिस्ट बॉलर. या चौघांपैकी एक फिरकीपटू आहे. तसेच इंग्लंडचा कॅप्टन बेन स्टोक्स मध्यमगती गोलंदाज आहे. त्यामुळे इंग्लंडची प्लेइंग ईलेव्हन पाहता पहिल्या सामन्यात वेगवान गोलंदाजांचा दबदबा पाहायला मिळू शकतो.

इंग्लंडची प्लेइंग ईलेव्हन पाहता टीम इंडिया त्याचा फायदा घेऊ शकते. इंग्लंडच्या गोलंदाजांकडे फारसा अनुभव नाही. टीम इंडिया विरूद्धच्या शेवटच्या मालिकेत जेम्स अँडरसन आणि स्टूअर्ट ब्रॉड हे अनुभवी वेगवान गोलंदाज होते. मात्र दोघेही निवृत्त झाले आहेत. त्यामुळे इंग्लंडची धुरा आता ब्रायडन कार्स, जोश टंग आणि शोएब बशीर यांच्याकडे आहेत. तर ख्रिस वोक्स हा टीम इंडियासाठी डोकेदुखी ठरला आहे. मात्र वोक्स व्यतिरिक्त टीम इंडियासाठी तशी डोकेदुखी नाही, असं म्हटलं तर वावगं ठरणार नाही. मात्र मैदानात जो सरस ठरणार तोच जिंकणार.

इंग्लंड प्लेइंग ईलेव्हन : झॅक क्रॉली, बेन डकेट, ऑली पोप, जो रूट, हॅरी ब्रूक, बेन स्टोक्स (कॅप्टन), जेमी स्मिथ, क्रिस वोक्स, ब्रायडन कार्स, जॉश टंग आणि शोएब बशीर.