जसप्रीत बुमराहला आराम महाग पडला, फक्त एका मॅचने गेम झाला, हार्दिक पंड्याला मिळाली खुशखबरी

मुंबई: भारताचा वेगवान गोलंदाज जसप्रीत बुमराहला (Jasprit Bumrah) आराम चांगलाच महाग पडला. इंग्लंड विरुद्ध तिसऱ्या वनडेत पाठिच्या दुखापतीमुळे बुमराह खेळला नाही. त्याला विश्रांती देण्यात आली होती. त्याच्याजागी मोहम्मद सिराजला संधी मिळाली. बुमराहला तिसऱ्या सामन्यातील विश्रांतीचा फटका गोलंदाजांच्या वनडे रँकिंग मध्ये बसला आहे. आयसीसीच्या ताजा वनडे रँकिंग (ICC Odi Ranking) मध्ये गोलंदाजांच्या यादीत बुमराहच्या क्रमवारीत एका स्थानाची घसरण झाली आहे. ऑलराऊंडर्सच्या यादीत हार्दिक पंड्याच्या (Hardik Pandya) क्रमवारीत 13 स्थानांची सुधारणा झाली आहे. तो 8 व्या नंबरवर पोहोचला आहे. भारताने वनडे सीरीज मध्ये इंग्लंडला 2-1 ने हरवलं.

बुमराह शेवटचा सामना खेळला नाही

बुमराह पाठीच्या दुखण्यामुळे तिसऱ्या वनडेत खेळला नव्हता. ज्यामुळे त्याला अव्वल स्थान गमवावं लागलं. न्यूझीलंडचा वेगवान गोलंदाज ट्रेंट बोल्ट 704 रेटिंग पॉइंटसह टॉपवर आहे. बुमराह त्याच्यापेक्षा एक पॉइंटने मागे आहे. इंग्लंड विरुद्ध वनडे सीरीजच्या पहिल्या दोन सामन्यात त्याने सरस खेळ दाखवला. ओव्हलवरील पहिल्या सामन्यात जसप्रीत बुमराहने 19 धावात 6 विकेट काढून सर्वोत्तम गोलंदाजी केली. करीयरमधलं त्याच हे सर्वोत्तम प्रदर्शन होतं. पुढच्या सामन्यात त्याने दोन विकेट काढल्या. युजवेंद्र चहलला रँकिंगमध्ये मोठा फायदा झाला. भारतीय स्टार स्पिनरच्या क्रमवारीत 4 स्थानांची सुधारणा झाली. तो चौथ्या क्रमांकावर पोहोचला. इंग्लंड विरुद्ध 6 विकेट 100 पेक्षा जास्त धावा करणाऱ्या हार्दिक पंड्याच्या फलंदाजीच्या रँकिंगमध्ये 8 स्थानांची सुधारणा झालीय. तो 42 व्या स्थानावर आहे.

A new No.1!

A busy week in ODI cricket has led to a number of changes in the @MRFWorldwide ICC Men’s Player Rankings.

Details ?

— ICC (@ICC) July 20, 2022

ऋषभ पंतची मोठी उडी

शेवटच्या वनडे मध्ये नाबाद 125 धावा फटकावणाऱ्या ऋषभच्या क्रमवारीत 25 स्थानाची सुधारणा झाली आहे. तो 52 व्या स्थानावर पोहोचलाय. पाकिस्तानचा कॅप्टन बाबर आजम फलंदाजांमध्ये शीर्षस्थानी आहे. विराट कोहली चौथ्या आणि रोहित शर्मा पाचव्या नंबरवर. ऑलराऊंडर्सच्या यादीत इंग्लंडच्या बेन स्टोक्सच्या क्रमवारीत चार स्थानांची घसरण झालीय. तो टॉप 10 मधून बाहेर गेलाय.