ENG vs IND : जो रुटचा झंझावात सुरुच, सचिन तेंडुलकरचा आणखी एक रेकॉर्ड ब्रेक

भारत विरुद्ध इंग्लंड यांच्यात 5 कसोटी सामन्यांच्या मालिकेतील सलामीचा सामना हा लीड्समधील हेडिंग्ले इथे खेळवण्यात येत आहे. टीम इंडियाच्या 3 फलंदाजांनी केलेल्या शतकी खेळीच्या जोरावर 471 धावा केल्या. यशस्वी जैस्वाल, कर्णधार शुबमन गिल आणि उपकर्णधार ऋषभ पंत या तिघांनी शतक केलं. त्यानंतर इंग्लंडला प्रत्युत्तरात टीम इंडिया विरुद्ध चांगली सुरुवात करता आली नाही. जसप्रीत बुमराह याने झॅक क्रॉलीला इंग्लंडच्या डावातील पहिल्याच ओव्हरमध्ये 4 धावांवर मैदानाबाहेरचा रस्ता दाखवला.

पहिल्या ओव्हरमध्ये विकेट गमावल्यानंतर बेन डकेट आणि ओली पोप जोडीने इंग्लंडचा डाव सावरला आणि 100 पार पोहचवलं. इंग्लंडला बुमराहनेच दुसरा झटका दिला. बुमराहने इंग्लंडच्या डावातील 29 व्या ओव्हरमध्ये विकेट मिळवून दिली. बुमराहने बेन डकेट याला 62 धावांवर बाद केलं. त्यानंतर चौथ्या स्थानी इंग्लंडचा अनुभवी फलंदाज आणि माजी कर्णधार जो रुट मैदानात आला. रुटने दुसरी धाव पूर्ण करताच इतिहास घडवला. रुटने टीम इंडियाचा माजी दिग्गज फलंदाज सचिन तेंडुलकर याचा रेकॉर्ड ब्रेक केला.

सचिन तेंडुलकर याचा महारेकॉर्ड ब्रेक

जो रुट इंग्लंडमध्ये भारत विरुद्ध इंग्लंड कसोटी मालिकेत सर्वाधिक धावा करणारा पहिला फलंदाज ठरला आहे. रुटने याबाबतीत सचिनला मागे टाकलं आहे. सचिन तेंडुलकर याने इंग्लंडमध्ये इंग्लंड विरुद्ध 17 कसोटी सामन्यांमध्ये 1 हजार 575 धावा केल्या होत्या. तर रुटने सचिनच्या तुलनेत 1 टेस्टआधीच हा कारनामा केला आहे.

इंग्लंडमध्ये भारत विरुद्ध इंग्लंड टेस्ट सीरिजमध्ये सर्वाधिक धावा

• जो रुट : 1 हजार 576* धावा
• सचिन तेंडुलकर : 1 हजार 575 धावा
• राहुल द्रविड़ : 1 हजार 376 धावा
• एलिस्टर कुक : 1 हजार 196 धावा
• सुनील गावसकर : 1 हजार 152 धावा

सनथ जयसूर्याचा रेकॉर्ड ब्रेक

तसेच जो रुट याने 8 धावा करताच श्रीलंकेचा माजी सलामीवीर सनथ जयसूर्या याचा विक्रम मोडीत काढला आहे. रुट जयसूर्याला मागे टाकत आंतरराष्ट्रीय क्रिकेटमध्ये सर्वाधिक धावा करणारा नववा फलंदाज ठरला आहे. रुटच्या खात्यात आंतरराष्ट्रीय कारकीर्दीत 21 हजार 33 धावा झाल्या आहेत. तर सनथ जयसूर्या याने 21 हजार 32 धावा केल्या होत्या. तसेच सर्वाधिक आंतरराष्ट्रीय धावांचा वर्ल्ड रेकॉर्ड सचिन तेंडुलकर याच्या नावावर आहे. सचिनने एकूण 34 हजार 357 धावा केल्या आहेत.