रोहित शर्मा या दोन स्पर्धानंतर आंतरराष्ट्रीय क्रिकेटला ठोकणार रामराम?

टीम इंडिया गेल्या 11 वर्षांपासून आयसीसी चषक मिळवण्यासाठी कासावीस होती. अनेक संधी चालून आल्या मात्र त्याचं सोनं करण्यात अपयश आलं. अखेर रोहित शर्माने 17 वर्षानंतर टी20 वर्ल्डकप जेतेपद मिळवून दाखवलं. तसेच 11 वर्षांपासून असलेला आयसीसी चषकांचा दुष्काळ दूर केला आहे. पण रोहित शर्माने जेतेपद मिळवताच टी20 क्रिकेटमधून निवृत्ती जाहीर केली आहे. असं असलं तरी रोहित शर्मा वनडे आणि कसोटी सामने खेळताना दिसणार आहे. म्हणजेच रोहित शर्मा आणखी एक वर्षे कर्णधार म्हणून दिसणार आहे. बीसीसीआयने त्या पद्धतीने रणनिती आखल्याचं दिसत आहे. रोहित शर्मा आगामी चॅम्पियन ट्रॉफित टीम इंडियाचं नेतृत्व करे. तसेच 2025 मध्ये होणाऱ्या वर्ल्ड टेस्ट चॅम्पियनशिपमध्येही कर्णधार म्हणून दिसेल. या दोन स्पर्धांनंतर रोहित शर्मा निवृत्ती जाहीर करण्याची शक्यता आहे. चॅम्पियन ट्रॉफीची तारीख निश्चित करण्यात आली आहे. ही स्पर्धा 19 फेब्रुवारी ते 9 मार्च दरम्यान होणार आहे.

चॅम्पियन्स ट्रॉफीचं यजमानपद पाकिस्तानकडे असून स्पर्धेसाठी लाहोर, कराची आणि रावळपिंडी ही मैदानं निश्चितक करण्यात आली आहेत. पण भारतीय संघ 2006 पासून पाकिस्तानला गेलेला नाही. त्यामुळे भारतीय संघ वनडे स्पर्धेत सहभागी होणार की नाही हा प्रश्न आहे. दुसरीकडे, वर्ल्ड टेस्ट चॅम्पियनशिप 1 जूनपासून लॉर्ड्सवर होणार आहे. भारताची कसोटीतील विजयी टक्केवारी 68.51 इतकी असून अंतिम फेरी गाठणं जवळपास निश्चित आहे. या क्रमवारीती दुसऱ्या स्थानावर ऑस्ट्रेलिया, तिसऱ्या स्थानावर न्यूझीलंड आणि चौथ्या क्रमांकावर श्रीलंका आहे.

रोहित शर्माचं वय सध्या 37 वर्षे आहे. त्यामुळे चॅम्पियन ट्रॉफी आणि वर्ल्ड टेस्ट चॅम्पियनशिप फायनलनंतर रोहित शर्मा आंतरराष्ट्रीय क्रिकेटला रामराम ठोकण्याची दाट शक्यता आहे. दुसरीकडे, टी20 संघांचं नेतृत्व हार्दिक पांड्याकडे येण्याची शक्यता आहे. या दोन स्पर्धांमध्ये जेतेपद मिळवलं की रोहितच्या क्रिकेट कारकिर्दिचा शेवट गोड होईल. असं असलं तरी रोहित शर्मा आयपीएल खेळताना दिसेल. आता रोहित शर्मा मुंबईकडून खेळणार की इतर संघाकडून हे मेगा लिलावात स्पष्ट होईल. दुसरीकडे, टी20 वर्ल्डकपमध्ये हार्दिक पांड्या उपकर्णधार होता. रोहित शर्माच्या गैरहजेरीत हार्दिक पांड्याने भारतीय संघाचं नेतृत्व केलं आहे. त्यामुळे हार्दिक पांड्याची निवड होणं जवळपास निश्चित आहे.