श्रीलंकेत रवींद्र जडेजा आणि संजय मांजरेकर पुन्हा आले आमनेसामने, थेट मनाला भिडणाऱ्या प्रश्नांचा केला मारा
भारत आणि श्रीलंका यांच्यात पहिला कसोटी सामना सुरू आहे. या कसोटी सामन्यादरम्यात समालोचक संजय मांजरेकर यांनी अष्टपैलू रवींद्र जडेजाला गाठलं आणि संवाद साधला. या दोघांमध्ये एक काळ वादाचा ठरला होता. पण या दोघांना एकत्र बोलताना पाहून क्रीडाप्रेमींना आश्चर्याचा धक्का बसला आहे.
भारतीय संघाचा अष्टपैलू खेळाडू रवींद्र जडेजा आणि माजी क्रिकेटपटू समालोचक असलेल्या संजय मांजरेकर यांचा पुन्हा आमनासामना झाला. खरं तर या दोघांमध्ये 2019 मध्ये पहिल्यांदा वादाची ठिणगी पडली होती. तुकड्या तुकड्यांमध्ये कामगिरी करणारा खेळाडू म्हणून मांजरेकर यांनी बोचरी टीका केली होती. त्यानंतर बरंच काही घडलं होतं. ट्वीटरवर पोस्ट वॉर रंगलं होतं. पण वर्ल्डकप स्पर्धेदरम्यान या वादावर पडदा पडला होता. या स्पर्धेच्या उपांत्य फेरीत न्यूझीलंडविरुद्धच्या रवींद्र जडेजाने 77 धावांची खेळी केली होती. तसेच अप्रतिम क्षेत्ररक्षण केलं होतं. जडेजाने समालोचन करणाऱ्या बॉक्सकडे बॅट दाखवून मैदानातूनच उत्तर दिलं होतं. या कामगिरीनंतर संजय मांजरेकर यांनी आपली चूक मान्य केली होती आणि जडेजाचा उल्लेख कणखर खेळाडू म्हणून केला होता. त्यानंतर 2022 मध्ये आशिया कप दरम्यान मांजरेकर यांनी जडेजाची मुलाखत घेतली होती. माझ्याशी बोलायला तू तयार आहेस ना जड्डू?, असं मांजरेकर यांनी विचारलं होतं. त्यावर जडेजाने हसून “हो नक्कीच” असे म्हटले होते.
आता पुन्हा एकदा संजय मांजरेकर यांनी श्रीलंका कसोटी दरम्यान रवींद्र जडेजाची मुलाखत घेतली. हा व्हिडीओची क्लिप सोशल मीडियावर व्हायरल झाली आहे. यात मांजरेकर यांनी पहिलाच प्रश्न विचारलं की, प्रामाणिकपणे सांग तुझं पहिलं प्रेम गोलंदाजी होतं की फलंदाजी? त्यावर रविंद्र जडेजाने उत्तर दिलं की, ‘रणजी ट्रॉफीत तुम्ही माझा डेटा काढाल तर माझी सरासरी 60च्या वर आहे. तीन 300 आणि दोन 250 धावा माझ्या नावावर आहेत. माझ्यात कुठे ना कुठे असं होतं की मी वर फलंदाजी करत असेल तर फलंदाजी करू शकतो. पण मी जसं सांगितलं की, मी खाली फलंदाजी करायचो तेव्हा तुमच्याकडे काहीच शिल्लक नसतं. कधी कधी असं होतं की सामना डिक्लेयर केला जातो. टेस्टमध्ये वनडे आणि टी20 सारखी स्थिती येते.’
A BEAUTIFUL INTERVIEW 🔥
– Sanjay Manjrekar talking cricket with Ravindra Jadeja. pic.twitter.com/Tjp1q3Geg1
— Johns. (@CricCrazyJohns) August 16, 2026
संजय मांजरेकर यांनी पुढे विचारलं की, आता कुठे ती वेळ आली की आता नंबर 1 कसोटी फॉर्मेट खेळत आहेस. बॅटिंग तुझं पहिलं प्रेम आहे. तर अशा स्थितीत तू तुला कोणच्या कॅटेगरीत टाकशील? आता बॅटिंग अष्टपैलू आहेस की बॉलिंग अष्टपैलू? यावर रवींद्र जडेजा म्हणाला की, ‘आता तर मी अशा स्थितीत आहे की संघाला काय गरज आहे. जर चेंडू वळत असेल तर मी फ्रंट लाईन बॉलर असेन. जर फ्लॅट विकेट असेल तर बॅटरची भूमिका बजावतो.’ त्यानंतर संजय मांजरेकर यांनी विचारलं की ड्राय विकेट आहे तर किती विकेट घेशील? त्यावर रवींद्र जडेजा म्हणाला की, जे काही मिळतील, पाच सहा विकेटच्या वर मिळतील. त्यावर मी आनंदी असेल.
