टी20 वर्ल्डकपपूर्वी हार्दिक पांड्याचं उपकर्णधारपद जाणार? या विकेटकीपर बॅट्समनकडे सोपवणार धुरा!

टी20 वर्ल्डकप स्पर्धा 1 जूनपासून अमेरिका आणि वेस्ट इंडिजमध्ये असणार आहे. या स्पर्धेत जेतेपदासाठी एकूण 20 संघांमध्ये लढत होणार आहे. या स्पर्धेसाठी टीम इंडियाची निवड 1 मे रोजी केली जाणार आहे. या निवडीदरम्यान हार्दिक पांड्याचं उपकर्णधारपद जाण्याची शक्यता वर्तवली जात आहे. निवडसमिती ऋषभ पंतकडे पुन्हा एकदा भारतीय संघाचं उपकर्णधारपद सोपवण्याची शक्यता आहे. क्रिकबजने आपल्या रिपोर्टमध्ये ही माहिती दिली आहे. पंत डिसेंबर 2022 मध्ये झालेल्या रस्ते अपघातात जखमी झाला होता. त्यानंतर त्याने थेट आयपीएलमधून क्रिकेट स्पर्धेत पुनरागमन केलं असून दिल्ली कॅपिटल्सची धुरा सांभाळत आहे. असं असलं तरी ऋषभ पंतने यापूर्वी टीम इंडियाची धुरा सांभाळली होती. दक्षिण अफ्रिका दौऱ्यात पाच सामन्यांच्या टी20 मालिकेत कर्णधारपद भूषवलं होतं. एकंदरीत ऋषभ पंत विकेटकीपर आणि लीडरशिपच्या भूमिकेत दिसल्यास आश्चर्य वाटायला नको.

दुसरीकडे, ऋषभ पंतला लीडरशिपच्या भूमिकेत संघात आणणं वाटतं तितकं सोपं नाही. हार्दिक पांड्या असताना असं करणं खूपच मोठा निर्णय ठरू शकतो. पण काही गोष्टी ऋषभ पंतच्या बाजूने दिसत आहेत. दिल्ली कॅपिटल्स आणि मुंबई इंडियन्स सामन्यात ऋषभ पंतने चांगल्या प्रकारे नेतृत्व हाताळलं होतं. दुसरीकडे, हार्दिक पांड्याच्या नेतृत्वात अभाव दिसून आल्याचं क्रीडाप्रेमी म्हणत आहेत. तसेच, क्रिकबझने आपल्या रिपोर्टमध्ये युझवेंद्र चहलला डावललं जाण्याची शक्यताही वर्तवली आहे. तर जसप्रीत बुमराहसह वेगवान गोलंदाजांच्या ताफ्यात संदीप शर्मा असू शकतो. 2015 नंतर संदीप शर्मा टीम इंडियात खेळलेला नाही.

भारतीय संघात फिरकीपटू म्हणून कुलदीप यादवला संधी मिळू शकते.दुसरीकडे, रवि बिष्णोई अक्षर पटेलवर भारी पडू शकतो. जसप्रीत बुमराह, मोहम्मद सिराज आणि अर्शदीप सिंग वेगवान गोलंदाज म्हणून ताफ्यात असू शकतात. तर चौथा वेगवान गोलंदाज म्हणून संदीप शर्माची निवड होऊ शकत. राजस्थान रॉयल्सकडून खेळत असलेल्या संदीप शर्माने स्लो मीडियम पेसने प्रभाव टाकला आहे. अमेरिका वेस्ट इंडिजच्या धीम्या खेळपट्टीवर प्रभाव ठरू शकतो.