U19 World Cup : पाकिस्तानला धूळ चारत ऑस्ट्रेलियाने गाठली अंतिम फेरी, फायनलमध्ये टीम इंडियाशी सामना
अंडर 19 वर्ल्डकप स्पर्धेच्या उपांत्य फेरीत ऑस्ट्रेलियाने पाकिस्तानचा पराभव करत अंतिम फेरी गाठली आहे. आता अंतिम फेरीत ऑस्ट्रेलियाशी होणार आहे. 11 फेब्रुवारीला हा सामना होणार असून कोण जेतेपद पटकवणार याची उत्सुकता आहे
मुंबई : अंडर 19 वर्ल्डकप स्पर्धेच्या उपांत्य फेरीत ऑस्ट्रेलियाने पाकिस्तानला लोळवलं. ऑस्ट्रेलियाने नाणेफेकीचा कौल जिंकल्यानंतर गोलंदाजी स्वीकारली. तसेच पाकिस्तानला मोठी धावसंख्या उभारण्याची संधी दिली नाही. अझान अवैस आणि अराफत मिन्हास या जोडीने संघाला 180 धावापर्यंत पोहोचवण्यास मदत केली. अझान अवैसने 91 चेंडूत 52 आणि अराफत मिन्हासने 61 चेंडूत 52 धावा केल्या. या व्यतिरिक्त एकही खेळाडू तग धरू शकला नाही.त्यामुळे पाकिस्तानने 48.5 षटकात सर्व गडी बाद 179 धावा केल्या आणि विजयासाठी 180 धावांचं आव्हान ठेवलं. ऑस्ट्रेलियाच्या या धावा गाठताना चांगलाच दम निघाला. ऑस्ट्रेलियाने 1 गडी राखून शेवटच्या षटकात पूर्ण केलं. पाकिस्तानने दिलेलं आव्हान गाठताना ऑस्ट्रेलियाचे 4 गडी झटपट बाद झाले. त्यामुळे दडपण आलं होतं. पण हॅरी डिक्सन आणि ओलिवर पीक यांनी डाव सावरला. पण मोक्याच्या क्षणी हॅरी डिक्सन 50 धावा करून बाद झाल्याने दडपण वाढलं. मिन्हासच्या गोलंदाजीवर क्लिन बोल्ड झाला.
पाकिस्तानने 200 पार धावा केल्या असत्या तर कदाचित ऑस्ट्रेलियाचा विजय कठीण झाला असता. 80 धावा आवश्यक असताना ओलिवर पीक कडवी झुंज दिली. पाच गडी बाद झाले असताना खेळपट्टीवर शेवटपर्यंत तग धरून राहिला. तसेच विजयाचा मार्ग सोपा केला. पण तो बाद झाल्यानंतर कधी सामना पाकिस्तानच्या पारड्यात, तर कधी ऑस्ट्रेलियाच्या पारड्यात अशी स्थिती होती. अखेर ऑस्ट्रेलियाने 1 गडी आणि 5 चेंडू राखून विजय मिळवला.
आता अंतिम फेरीत भारतासमोर ऑस्ट्रेलियाचं आव्हान असणार आहे. 11 फेब्रुवारीला अंतिम फेरीचा सामना होणार आहे. भारताने नवव्यांदा, तर ऑस्ट्रेलियाने सहाव्यांदा अंतिम फेरी गाठली आहे.
दोन्ही संघांची प्लेइंग इलेव्हन
ऑस्ट्रेलिया अंडर 19 (प्लेइंग इलेव्हन): हॅरी डिक्सन, सॅम कोन्स्टास, ह्यू वेबगेन (कर्णधार), हरजस सिंग, रायन हिक्स (विकेटकीपर), टॉम कॅम्पबेल, ऑलिव्हर पीक, राफ मॅकमिलन, टॉम स्ट्रेकर, महली बियर्डमन, कॅलम विडलर
पाकिस्तान U19 (प्लेइंग इलेव्हन): शमिल हुसैन, शाहजेब खान, अझान अवेस, साद बेग (कर्णधार/विकेटकीपर), अहमद हसन, हारून अर्शद, अराफत मिन्हास, नावेद अहमद खान, उबेद शाह, मोहम्मद झीशान, अली रझा
