Vaibhav Sooryavanshi: “20 वर्षाचा होऊदे मग…”, माजी कॅप्टन कपिल देव यांची वैभव सूर्यवंशीला वॉर्निंग!

आयर्लंडविरुद्धच्या टी-20 मालिकेसाठी भारतीय संघात दाखल झाल्यानंतर 15 वर्षीय वैभव सूर्यवंशी चर्चेचा विषय बनला आहे. बिहारच्या या युवा फलंदाजाचा आयर्लंड आणि इंग्लंड दौऱ्यांसाठी, तसेच आशियाई खेळांसाठी भारतीय संघात समावेश करण्यात आला आहे. असे मानले जाते की, या दौऱ्यावर पदार्पण केल्यावर तो वयाच्या 16 वर्षे आणि 205 दिवसांत भारतासाठी खेळणारा सर्वात तरुण खेळाडू ठरेल. 1983 विश्वचषक विजेते कर्णधार कपिल देव, जे सचिन तेंडुलकरच्या पदार्पणाच्या सामन्यात सामनावीर ठरले होते, त्यांनी वैभवच्या प्रतिभेची उघडपणे प्रशंसा केली आहे. त्यांच्या मते या युवा फलंदाजाच्या कारकिर्दीबद्दल अंतिम मत बनवणे खूप घाईचे ठरेल.

‘द इंडियन एक्सप्रेस’शी बोलताना कपिल देव म्हणाले, “वैभव सूर्यवंशी खूप लहान आहे. पण हो, तो एक विशेष प्रतिभावान खेळाडू आहे आणि बस्स. तो 16 वर्षांचा मुलगा आहे आणि त्याच्यापुढे अजून खूप क्रिकेट बाकी आहे. तो 20-22 वर्षांचा झाल्यावर आम्ही त्याचे मूल्यांकन करू. पण त्याची प्रतिभा विलक्षण आहे यात काही शंका नाही. तो 16 वर्षांच्या सचिनसारखा आहे, पण तो इतका काळ खेळू शकेल का? त्याला अजून खूप मोठा पल्ला गाठायचा आहे.”

वैभव सूर्यवंशीने गेल्या वर्षी आयपीएलमध्ये शतक झळकावणारा सर्वात तरुण खेळाडू बनून इतिहास रचला. त्यानंतर त्याने 19 वर्षांखालील विश्वचषक अंतिम सामन्यात विक्रमी 175 धावा करून भारताला विजेतेपद मिळवून देण्यात महत्त्वाची भूमिका बजावली. या हंगामात, त्याने राजस्थान रॉयल्ससाठी 16 डावांमध्ये 237.70 च्या स्ट्राइक रेटने 776 धावा करून सर्वांचे लक्ष वेधून घेतले. वैभवने आयपीएलच्या एका हंगामात 700  हून अधिक धावा करणारा पहिला अनकॅप्ड खेळाडू बनण्याचा विक्रम रचला. तसेच, तो टी-20 क्रिकेटच्या इतिहासात स्पर्धेच्या एकाच हंगामात 500 पॉवरप्ले धावा करणारा पहिला फलंदाज ठरला. त्याच्या प्रभावी कामगिरीमुळे त्याला स्पर्धेचा मोस्ट व्हॅल्युएबल प्लेयर, इमर्जिंग प्लेयर अवॉर्ड आणि ऑरेंज कॅप मिळाली.

अलीकडेच, श्रीलंकेत झालेल्या ‘अ’ त्रिकोणी मालिकेत, वैभवने श्रीलंका ‘अ’ संघाविरुद्ध अवघ्या 11 चेंडूंमध्ये 94 धावा करून अर्धशतक झळकावले. यासोबतच, त्याने 50 षटकांच्या सामन्यातील सर्वात जलद अर्धशतकाचा विक्रमही रचला. जेव्हा कपिल देव यांना वैभव सूर्यवंशीसाठी एक विशेष संदेश देण्यास सांगितले गेले, तेव्हा त्यांनी संपूर्ण भारतीय संघाला शुभेच्छा दिल्या. या प्रश्नाला उत्तर देताना कपिल देव म्हणाले, “मी भारतीय संघाला शुभेच्छा देऊ इच्छितो. केवळ त्यालाच नाही, तर संपूर्ण भारतीय संघाला आणि प्रत्येक खेळाडूला. आणि तो सुद्धा त्याच संघाचा एक भाग आहे.”