Mirabai Chanu : ‘पाळीचा तिसरा दिवस, अशक्तपणा आणि …’, मीराबाई चानूच्या हातून कसं निसटलं ऑलिंपिक मेडल ?

पॅरिल ऑलिंपिक 2024 मध्ये 7 ऑगस्ट रोजी वेटलिफ्टिंग स्पर्धेत लाखो देशवासियांच्या नजरा मीराबाई चानूवर खिळल्या होत्या आणि अनेकांच्या डोळ्यात पदकाची आशा होती. मात्र कोणतीही कमाल करण्यात मीराबाई हिला अपयश आलं आणि ती मेडल काही मिळवू शकली नाही. क्लीन अँड जर्कच्या शेवटच्या प्रयत्नात मीराबाईला 114 किलो वजन उचलता आले नाही अन् त्यामुळे ती पदकाच्या शर्यतीतून बाहेर पडली.

8 ऑगस्ट म्हणजेच आज मीराबाईचा वाढदिवस ( वय 30) असतो, अशा वेळीच तिला इतिहास रचण्याची संधी होती. मात्र तिला पदक जिंकण्यात अपयश आले. ही स्पर्धा आटोपल्यानंतर एका व्हिडीओद्वारे सर्वांशी संवाद साधत हे मेडल मिळवण्यात आपण अपयशी का ठरलो याचं कारण सांगितलं. मासिक पाळीचा (पीरियड) तिसरा दिलस होता, आणि ही कामगिरी करणं खूप कठीण होतं, असं तिने नमूद केलं.

काय म्हणाली मीराबाई चानू ?

‘माझ्या आजच्या कामगिरीने मी खूश आहे, सर्वांना माहित आहे की मला खूप दुखापती झाल्या आहेत, रिओ (2016 ऑलिम्पिक) मध्ये माझ्यासोबत काय झाले याचीही सर्वांना कल्पना आहे. तिथे माझे पदक हुकले होते. पण हे प्रत्येक खेळाडूसोबत घडतं.’ ‘ त्यानंतर मी वर्ल्ड चँपियन बनले. टोकिया ऑलिंपिकमध्ये मी भारतासाठी रौप्य पदक जिंकलं. यावेळीही मी पूर्ण प्रयत्न केले, पण दुखापतीमुळे एशियन गेम्समध्ये माझी काय हालत झाली होती हे सर्वांना माहीत आहे. त्यानंतर 4-5 महीने मी रिहॅबमध्ये होते. पॅरिस ऑलिंपिक स्पर्धेच्या तयारीसाठी खूप कमी वेळ होता. मी (जिंकण्यासाठी) पूर्णपणे प्रयत्न केले, पण तसं होऊ शकलं नाही.’

ऑलिंपिकमधील परफॉर्मन्सबद्दलही मीराबाई बोलली – ‘ आज माझं नशीब खराबं होतं आणि पीरियड्सही (मासिक पाळी) होते. माझा आज तिसरा दिवस होता. गेल्या वेळी मी जेव्हा ऑलिंपिक स्पर्धेत उतरले होते, तेव्हा माझा दुसरा दिवस होता, तर यावेळच्या स्पर्धेत माझा तिसरा दिवस होता. या सगळ्याचा नाही म्हटलं तरी शरीरावर थोडाफार तरी परिणाम होतोच. पण मी माझ्या बाजून पूर्णपणे प्रयत्न केले होते. मात्र यावेळी मी मेडल जिंकू शकले नाही. त्याबद्दल मी सर्वांची माफी मागते ‘ असं तिने व्हिडीओमध्ये नमूद करत देशवासियांकडे क्षमा मागितली.

#WATCH | Paris: Indian Weightlifter Mirabai Chanu speaks on finishing 4th in women’s 49 kg weightlifting event at #ParisOlympics2024

She says, “I tried my best to win a medal for the country but I missed it today…It is a part of the game, we all sometimes win and sometimes… pic.twitter.com/hPyYCt7AOL

— ANI (@ANI) August 7, 2024

अवघ्या एका किलोने हुकलं मेडल

मीराबाई आज (8 ऑगस्ट) ३० वर्षांची झाली आहे. आज तिला वाढदिवसानिमित्त इतिहास रचण्याची संधी होती, पण ती हुकली. 49 किलो वजनी गटात भाग घेणाऱ्या मीराबाईने स्नॅच फेरीत उत्कृष्ट प्रयत्न केले आणि या फेरीनंतर ती तिसऱ्या स्थानावर राहिली. या फेरीत तिने 88 किलो वजन उचलले होते. यानंतर क्लीन अँड जर्कमध्ये तिच्याकडून खूप अपेक्षा होत्या. पण इथे तिने निराशा केली आणि पदक हुकलं.

मीराबाई चानूने स्नॅचमध्ये 88 किलो आणि क्लीन अँड जर्कमध्ये 111 किलो, एकूण 199 किलो वजन उचलले. यामुळे तिचे पदक अवघ्या एक किलोने हुकले. सुवर्णपदकाची प्रबळ दावेदार असलेल्या चीनची सध्याची ऑलिम्पिक चॅम्पियन हॉउ झिहुईने क्लीन अँड जर्कमध्ये ऑलिम्पिक विक्रमासह पहिले स्थान मिळविले. तिने एकूण 206 किलो वजन उचलले (स्नॅच 89, क्लीन अँड जर्क 117), तर रोमानियाची व्हॅलेंटिना कॅम्बेई 206 (93 आणि 112) किलो वजनासह रौप्य पदक जिंकण्यात यशस्वी ठरली आणि थायलंडच्या सुरोदचना खांबोने 200 (88 आणि 112) किलो वजनासह कांस्यपदक जिंकण्यात यश मिळविले.

शेवटच्या प्रयत्नाही मीराबाई ठरली अपयशी

क्लीन अँड जर्कच्या पहिल्याच प्रयत्नात मीराबाईने 111 किलो वजन उचलण्याचा प्रयत्न केला, पण ती अयशस्वी ठरली. यानंतर, तिने लगेचच दुसऱ्या प्रयत्नात हे 111 किलो वजन उचलले आणि पदकावर दावा केला. यानंतर क्लीन अँड जर्कच्या तिसऱ्या आणि शेवटच्या प्रयत्नात तिने 114 किलो वजन उचलण्याचा निर्णय घेतला. पण ती यशस्वीरित्या उचलू शकली नाही आणि चौथ्या स्थानावर राहून पॅरिस ऑलिम्पिकमधून बाहेर पडली.