लॅपटॉपसारखा अनुभव देणारा HP चा नवीन टॅबलेट भारतात लाँच, जाणून घ्या किंमत
एचपीने भारतात नवीन ओम्निपॅड 12 सादर केला आहे, ज्यामध्ये 12-इंचाचा डिस्प्ले आणि काढता येण्याजोगा कीबोर्ड आहे. म्हणजेच वापरकर्त्यांना एकूणच लॅपटॉपसारखा अनुभव घेता येणार आहे. चला तर मग या टॅबची किंमत जाणून घेऊयात.
एचपीने भारतात त्यांचा नवीन ओम्निपॅड 12 सादर केला आहे, जो टॅब्लेट आणि लॅपटॉप अशा दोन्ही प्रकारे काम करतो. हे डिव्हाईस विशेषतः विद्यार्थी, व्यावसायिक आणि पहिल्यांदा पीसी वापरणाऱ्यांसाठी तयार करण्यात आले आहे. तसेच या टॅबलेटमध्ये एक काढता येण्याजोगा कीबोर्ड आहे, ज्यामुळे वापरकर्त्यांना टॅब्लेट आणि लॅपटॉप मोडमध्ये सहजपणे बदल करता येणार आहे. क्वालकॉम स्नॅपड्रॅगन प्रोसेसरवर चालणारे हा टॅबलेट अँड्रॉइड ऑपरेटिंग सिस्टमला सपोर्ट करतो. कंपनीचा दावा आहे की, हा टॅब्लेट एकदा चार्ज केल्यावर 18 तासांपर्यंत बॅटरी लाईफ देऊ शकतो.
भारतातील किंमत आणि उपलब्धता
भारतात एचपी ओम्निपॅड 12 ची किंमत 48 हजार 999 रूपयांपासून सुरू झाली आहे. हा टॅब्लेट जून महिन्यापासून खरेदीसाठी उपलब्ध होईल. तसेच एचपीच्या अधिकृत वेबसाइट, ॲमेझॉन, रिलायन्स स्टोअर्स आणि एचपी वर्ल्ड स्टोअर्सवर मधून हा टॅबलेट खरेदी करता येणार आहे. कंपनीने हा टॅब्लेट फक्त डेनिम ब्लू या एकाच रंगात सादर केला आहे. या सादरीकरणामुळे एचपीने एका नवीन टॅब्लेट सेगमेंटमध्ये प्रवेश केला आहे. कंपनी अशा वापरकर्त्यांवर लक्ष केंद्रित करत आहे, ज्यांना एकाच डिव्हाइसमध्ये टॅब्लेट आणि लॅपटॉप या दोन्हींचा अनुभव हवा आहे. त्याची किंमत पाहता, हे डिव्हाइस मिड-प्रीमियम श्रेणीत येते.
डिस्प्ले आणि परफॉर्मन्स वैशिष्ट्ये
या टॅब्लेटमध्ये 1200×2000 पिक्सेल रिझोल्यूशनचा 12-इंचाचा 2K डिस्प्ले आहे.
यात 16:10 आस्पेक्ट रेशो आणि 90Hz रिफ्रेश रेट आहे, ज्यामुळे एक स्मूथ व्हिज्युअल अनुभव मिळतो. डिस्प्लेची ब्राइटनेस 400 निट्सपर्यंत पोहोचते, ज्यामुळे स्क्रीन बाहेरच्या उन्हातही स्पष्ट दिसते.
परफॉर्मन्ससाठी, यात सहा कोअर्स आणि 2.40GHz पर्यंत क्लॉक स्पीड असलेला क्वालकॉम स्नॅपड्रॅगन SM6475Q प्रोसेसर आहे. तसेच या टॅबमध्ये एक Adreno GPU, 8GB LPDDR5 रॅम आणि 128GB UFS स्टोरेज देखील आहे, जे मायक्रोएसडी कार्डद्वारे वाढवता येते.
कॅमेरा आणि कनेक्टिव्हिटी सिस्टम
एचपी ओम्निपॅड 12 मध्ये 13-मेगापिक्सलचा मागील कॅमेरा आणि 8-मेगापिक्सलचा पुढील कॅमेरा आहे, जो व्हिडिओ कॉल आणि सेल्फीसाठी उपयुक्त आहे. यात एक काढता येण्याजोगा मायका सिल्व्हर सॉफ्ट-कव्हर कीबोर्ड देखील आहे, जो पोगो पिनद्वारे टॅबलेटला जोडला जातो. कनेक्टिव्हिटी पर्यायांमध्ये वायफाय 6E, ब्लूटूथ 5.2, एक यूएसबी टाइप-सी पोर्ट आणि 3.5mm हेडफोन जॅक यांचा समावेश आहे. यात क्वाड स्पीकर्स आणि ड्युअल मायक्रोफोन्स, तसेच डीटीएस एक्स अल्ट्रा सपोर्ट देखील आहे, ज्यामुळे ऑडिओची गुणवत्ता सुधारते.
बॅटरी आणि डिझाइन तपशील
या टॅब्लेटमध्ये 2-सेल 31Wh लिथियम-आयन बॅटरी आहे, जी 33W चार्जरने चार्ज करता येते. कंपनीचा दावा आहे की, पूर्ण चार्ज झाल्यावर हे डिव्हाइस 18 तासांपर्यंत चालते, ज्यामुळे ते दीर्घकाळ चालणाऱ्या कामासाठी आणि अभ्यासासाठी आदर्श ठरते. याचे वजन 600 ग्रॅम आहे, तर कीबोर्डचे वजन 650 ग्रॅम आहे.
