फोन हरवला? टेन्शन नको, हरवलेला फोन गुगल शोधून देणार!

मुंबई: तुमचा फोन हरवला असेल तर आता काळजी करण्याचे कारण नाही. कारण आता गुगल तुमचा हरवलेला फोन शोधण्यास मदत करणार आहे. त्यासाठी गुगलने एक खास फीचर आणले आहे. या फीचरच्या माध्यमातून तुम्ही तुमचा हरवलेला फोन परत मिळवू शकता. ‘Find my device’ या गुगल अॅपद्वारे तुम्ही हरवलेला फोन शोधू शकता.

गुगलच्या फाईंड माय डिव्हाईस या अॅपमध्ये एक नवं फीचर अॅड करण्यात आलं आहे. ‘Indoor Maps’ असं या फीचरचं नाव आहे. इनडोअर फीचर तुम्हाला तुमचा हरवलेला फोन परत मिळवून देण्यास मदत करेल.

इनडोअर मॅप्स फीचरच्या माध्यमातून गुगल युजरला काही इमारतींचा (विमानतळ, मॉल्स) इनडोअर व्ह्यूव दाखवेल. यामुळे युजर आपला फोन कुठे विसरला आहे ते फाईड माय डिव्हाईसच्या माध्यमातून  कळू शकेल. विशेष म्हणजे,जोपर्यंत आपला फोन आपल्याला सापडत नाही तोपर्यंत फोन लॉकच राहील अशी सुविधाही देण्यात आली आहे.

या इनडोअर मॅपमध्ये कुठल्या कुठल्या इमरतींचा व्ह्यूव दिसू शकेल, हे गुगलने अजून स्पष्ट केलेले नाही. फोन शोधण्यासाठी वापरण्यात येणाऱ्या इतर अॅपच्या तुलनेत गुगलचा फाईड माय डिव्हाईस अॅप आपल्याला अधिक उपयोगी ठरु शकेल. या अॅपमध्ये विमानतळ आणि मॉल्स किंवा इतर मोठ्या इमारतींमध्ये तुमचा स्मार्टफोन शोधण्यास मदत करु शकतो.

फाईंड माय डिव्हाइस अॅप उपभोगकर्त्यांसाठी खूप फायद्याचं ठरणार आहे. हे अॅप सायलेंट मोड किंवा लॉक असलं तरी तुम्हाला अलर्ट देतं आणि लॉक स्क्रीनवरही तुम्हाला कॉन्टॅक्ट नंबर दाखवतो.