हेल्थ इन्शुरन्स काढताय, अगोदर या 5 गोष्टी तपासा, अन्यथा क्लेम रिजेक्ट होणार; पैसे जातील वाया!

आपल्या कुटुंबाला काहीही होऊ नये यासाठी प्रत्येक जण काळजी घेत असतो.  भविष्यात कोणतीही अडचण येऊ नये यासाठी काळजी घेतली जाते.  काळजीपोटी सर्वात प्रथम हेल्थ इन्शुरन्स काढला जातो. कारण जवळची व्यक्ती रुग्णालयात भरती झाली की जीव कासावीस होतो. उपचार आणि खर्च याची सांगड घालणं कठीण होतं. त्यामुळे जवळ हेल्थ इन्शुरन्स असेल तर काळजी नसते. पण हेल्थ इन्शुरन्स नसेल आणि व्यक्ती रुग्णालयात दाखल झाली की सर्व जमापुंजी संपून जाते. त्यामुळे हेल्थ इन्शुरन्स असणं कधीही चांगलं असतं. आता तर ऑनलाईन हेल्थ इन्शुरन्स काढणंही सोपं झालं आहे. एका क्लिकवर मोबाईल एपच्या माध्यमातून तुम्ही काढू शकता. पण असं असताना काही गोष्टींची काळजी घेणं गरजेचं आहे. पॉलिसीचे नियम जाणून घेणं आवश्यक आहे. अन्यथा छोटीशी अटही आपल्याला गोत्यात आणू शकते.

पॉलिसी खरेदी करण्यापूर्वी या पाच गोष्टी लक्षात ठेवा

कॅशलेस म्हणजे पैसे द्यायचेच नाही असं नाही : अनेकांना वाटतं की हेल्थ इन्शुरन्स काढलं की झालं. आता काही टेन्शन नाही. रुग्णालयात दाखल झालं की खिशातून काहीच द्यावं लागणार नाही. पण तसं नाही. कॅशलेस म्हणजे पॉलिसीत कवर होणाऱ्या खर्चाचा तालमेल विमा कंपनी आणि रुग्णालय यांच्यात असतो. त्यामुळे विमा कंपनी प्रत्येक खर्च देईलच असं नाही. उदाहरण द्यायचं झालं तर हातमोजे, सिरिंज, मास्क, पीपीई किट यांचा खर्च पॉलिसीत नसतो. पॉलिसीच्या अटीनुसार हा खर्च वाजवी मानला जातो.

रूम भाड्याची मर्यादा नक्की तपासा: पॉलिसी खरेदी करण्यापूर्वी तुम्हाला रुमचं भाडं किती आहे हे नक्की तपासा. कारण तुमच्या दाव्यावर त्याचा परिणाम नक्कीच होतो. कारण तुमच्या पॉलिसीत खोलीचे भाडे निश्चित असतं. पण तुम्ही महागडी खोली निवडली तर निर्धारित रक्कमेच्या वरचे पैसे तुम्हाला द्यावे लागतील.

एजेंटचं म्हणणं शेवटचं असं करू नका: एजेंट पॉलिसी खपवण्यासाठी आणि त्याच्या कमाईसाठी बरंच काही सांगतात. पण पॉलिसी खरेदी करण्यापूर्वी तसंच आहे का एकदा तपासून घ्या. एजेंटने सांगितलेल्या सर्व गोष्टी पॉलिसीत आहेत की नाही तपासा.

जुना आजार लपवू नका : अनेकदा पॉलिसी घेताना जुना आजार लपवला जातो. जसं की बीपी, डायबिटीज, थायरॉइड या सारख्या गोष्टी सांगितल्या जात नाहीत. काही जण प्रीमियर वाढेल या भीतीपोटी सांगत नाहीत. पण त्यानंतर रुग्णालयाच्या रेकॉर्डमध्ये जुन्या आजाराची माहिती मिळते आणि क्लेम वादात अडकतो. त्यामुळे मेडिकल हिस्ट्री सांगणं सुरक्षित मानलं जातं.

फक्त प्रीमियर पाहून पॉलिसी घेऊ नका: अनेकदा स्वस्त पॉलिसी म्हणून लगेच खरेदी करण्याचा मोह होतो. पण स्वस्त पॉलिसीत मर्यादाही असतात हे विसरू नका. काही आजारपण त्या पॉलिसीत कवर होत नाहीत. त्यामुळे पॉलिसी खरेदी करताना स्वस्त महाग न पाहता. त्यातील अटी आणि शर्थी काय आहेत ते पाहा.