Investment : फेस्टिव्ह ऑफर! बचत तर होणार पण कॅशबॅकही मिळणार

नवी दिल्ली : सध्या बाजारात सणाचा उत्साह (Festive Seasons) आहे. दसरा तोंडावर आलाय तर त्यापाठोपाठ दिवाळी येणार आहे. ग्राहकांसाठी आता विविध ऑफर (Offers) येत आहेत. काही ऑफर्स या फसव्या असतात. तर काही आवळा देऊन कोहळा काढणाऱ्या असतात. पण या ऑफरमधून तुमची बचत तर होईलच पण कॅशबॅकही (Cashback) मिळेल.

स्टेट बँक ऑफ इंडियाच्या (SBI) क्रेडिट कार्ड विभागाने (SBICARD) सणाच्या तोंडावर ही खास ऑफर आणली आहे. SBI ने फेस्टिव्ह ऑफर 2022 (Festive Offer 2022) ची घोषणा केली आहे. यामध्ये ग्राहकांना अनेक पद्धतीने फायदा होणार आहे. या ऑफरची सुरुवात झाली आहे.

एसबीआय क्रेडिट कार्डधारकाला या ऑफरचा फायदा उचलता येईल. येत्या 31 ऑक्टोबर 2022 पर्यंत ही ऑफर सुरु राहणार आहे. विविध पार्टनर ब्रँड्सच्या मदतीने ग्राहकांना 22.5% टक्क्यांपर्यंत कॅशबॅक देण्याचा दावा बँकेने केला आहे.

सणासुदीत एसबीआयने 10-15 नव्हे तर तब्बल 1600 ऑफर्सची लॉटरी आणली आहे. त्यामुळे प्रत्येक ग्राहकाला याचा फायदा मिळणार आहे. ग्राहकांना टियर 1, टियर 2 आणि टियर 3 या शहरात ऑनलाईन आणि ऑफलाईन पद्धतीने या ऑफर्सचा लाभ घेता येईल.

त्यांना आवडीच्या आणि लोकप्रिय ग्राहक उपयोगी वस्तू खरेदी करताना आकर्षक ऑफर मिळतील. यामध्ये इलेक्ट्रॉनिक्स, मोबाईल, फॅशन आणि लाईफस्टाईल, आभूषण, ट्रॅव्हल आणि ऑनलाईन मार्केटप्लेसची यांचा समावेश आहे.

एसबीआय क्रेडिट कार्ड ग्राहकांना फेस्टिव्ह ऑफर 2022 साठी 2600 शहरात 70 हून अधिक ऑफर मिळतील. तर या कार्डधारकांना 1550 स्थानिक ऑफर मिळतील. फेस्टिव्ह ऑफरनुसार ग्राहकाला विविध ब्रँड्सवर 22.5% टक्क्यांपर्यंत कॅशबॅकचा लाभ घेता येईल.

या ऑफर्ससोबत ग्राहकांना ईएमआयची सुविधाही देण्यात आली आहे. देशभरातील 1.6 लाख व्यापारी आणि 2.25 लाखांहून अधिक स्टोअर्सवर ईएमआयची सुविधा उपलब्ध आहे. तसेच ईएमआयवर 15% कॅशबॅकचीही सुविधा देण्यात आली आहे.