मतदार यादीत नाव आलं नसेल तर आत्ताच करा तक्रार; अखेरची तारीख… 2 कोटी 7 लाख लोकांची नावे वगळली

महाराष्ट्रातील मतदार यादी सुधारणा मोहिमेंतर्गत पहिल्या यादीमधून तब्बल दोन कोटी सात लाख मतदारांची नावे वगळण्यात आली आहेत. ही आकडेवारी एसआर मोहिमेच्या पहिल्या टप्प्यातील असून, निवडणूक आयोगाने नावे वगळल्यानंतरची पहिली यादी नुकतीच जाहीर केली आहे. ज्या मतदारांची नावे यादीतून वगळली गेली आहेत, त्यांच्यासाठी ३० सप्टेंबरपर्यंत तक्रार दाखल करण्याची अंतिम मुदत ठेवण्यात आली आहे.

निवडणूक आयोगाने नावे वगळण्यामागे अनेक कारणे दिली आहेत. काही मतदारांनी आवश्यक फॉर्म जमा केले नाहीत, तर काही जणांचे रेकॉर्ड अजूनही डिजिटलाइझ झालेले नाहीत. प्रत्यक्ष पाहणीवेळी काही मतदार अनुपस्थित होते. याशिवाय, काही मतदारांनी स्थलांतर केले आहे, काही मतदारांचा दुर्दैवाने मृत्यू झाला आहे, तर काही मतदारांची नावे यादीत दोनदा समाविष्ट होती. अशा विविध कारणांमुळे ही नावे वगळण्यात आली आहेत. यादीतून नाव गायब असलेल्या मतदारांना मतदार यादीत पुन्हा नाव समाविष्ट करण्यासाठी फॉर्म ६ भरावा लागेल. तसेच, मतदार यादीतील नोंदीबाबत तक्रार करण्यासाठी किंवा आक्षेप घेण्यासाठी फॉर्म ७ सादर करणे आवश्यक आहे. पत्ता बदलला असल्यास, त्यासाठी फॉर्म ८ भरण्याची सोय उपलब्ध आहे. या सर्व तक्रारींचे निवारण २९ ऑक्टोबरपर्यंत करण्यात येणार आहे. त्यानंतर, ४ नोव्हेंबर २०२६ रोजी अंतिम मतदार यादी प्रकाशित केली जाईल. मतदारांनी वेळेत कार्यवाही करून आपले नाव मतदार यादीत असल्याची खात्री करून घ्यावी.