पावसाअभावी शेती उद्ध्वस्त, शेतकऱ्यांची दिवाळी संकटात; नवनीत राणा म्हणाल्या…

अमरावती जिल्ह्यात पावसाअभावी सोयाबीन आणि कपाशी पिकांचे मोठे नुकसान झाले आहे. भातकुली तालुक्यात केवळ ४४ टक्के पाऊस झाल्याने शेतकरी मोठ्या आर्थिक संकटात सापडले आहेत. भाजप नेत्या नवनीत राणा यांनी भातकुली तालुक्यातील नुकसानग्रस्त भागाची पाहणी केली. यावेळी त्यांनी शेतकऱ्यांसोबत संवाद साधत त्यांच्या समस्या जाणून घेतल्या. राणा यांनी सांगितले की, कपाशी अक्षरशः खराब झाली असून बोंडही धरले नाहीत, त्यामुळे प्रचंड नुकसान झाले आहे. त्यांनी शेतकऱ्यांची परिस्थिती अत्यंत वाईट असून मोठा दुष्काळ असल्याचे नमूद केले.

मुख्यमंत्री साहेब बांधापर्यंत पोहोचले असून त्यांनी दुष्काळ जाहीर केला आहे. आता तालुक्या-तालुक्यात पंचनामे कसे होत आहेत, याची पाहणी करण्यासाठी आपण फिरत असल्याचे त्यांनी सांगितले. राणा यांनी कृषी अधिकारी आणि तहसीलदारांना खरी परिस्थिती दर्शवणारे पंचनामे पाठवण्याचे आवाहन केले. “आमचे मुख्यमंत्री देवेंद्र फडणवीस जी यांना शेतकऱ्यांची जाण आहे आणि ते चांगल्या पद्धतीने त्यांची दिवाळी होऊ देतील,” असा विश्वास त्यांनी व्यक्त केला. शेतकऱ्यांना तातडीने मदत मिळणे आवश्यक असल्याचे त्यांनी अधोरेखित केले.