मुंबई चौपाटीवर गणेश विसर्जनानंतर ‘Sea Shore Shine’ स्वच्छता मोहिम, अमृता फडणवीसांचा निर्धार

मुंबईच्या जुहू चौपाटीवर नुकतीच सी शोर शाईन या विशेष स्वच्छता मोहिमेचे आयोजन करण्यात आले. गणेश विसर्जनानंतर समुद्रकिनाऱ्यावर जमा झालेला कचरा आणि निर्माल्य स्वच्छ करण्याच्या उद्देशाने ही मोहीम राबवण्यात आली, ज्याचे नेतृत्व अमृता फडणवीस यांनी केले. यावेळी बोलताना, मुंबईला पर्यटनासाठी देशातील नंबर एकचे शहर बनवण्याचा निर्धार त्यांनी व्यक्त केला. या मोहिमेत बीएमसी, मुंबई पोलीस यांच्यासह दिव्या फाउंडेशन, जगद्गुरू श्रीमद् रामानुजाचार्य नरेंद्रचार्यजी, नानासाहेब धर्माधिकारी प्रतिष्ठान, अनिरुद्ध बापू यांचे अनुयायी आणि शाळांमधील विद्यार्थी मोठ्या संख्येने सहभागी झाले होते.

अमृता फडणवीस यांनी सांगितले की, शहर स्वच्छ ठेवण्याची जबाबदारी आपली सर्वांची आहे आणि प्रशासनासोबत नागरिकही यात सहभागी होत आहेत. आमदार राम कदम यांनी दिव्या फाउंडेशन गेली सहा वर्षांपासून सातत्याने हे कार्य करत असल्याचे नमूद केले. सामूहिक प्रयत्नानेच मुंबई स्वच्छ आणि सुंदर ठेवता येईल, हा संदेश या मोहिमेतून देण्यात आला.