Anjali Damania | चार्टर्ड विमानातून दिल्ली दौरा, चाललंय तरी काय? आता अंजली दमानिया मैदानात, मागितला हिशोब!

राज्यातील सध्याच्या राजकीय घडामोडी आणि काही खासदारांच्या दिल्ली दौऱ्याच्या चर्चांवर सामाजिक कार्यकर्त्या अंजली दमानिया यांनी तीव्र प्रतिक्रिया व्यक्त केली आहे. चार्टर्ड विमानाने दिल्लीला जाणाऱ्या खासदारांच्या दौऱ्यांचा खर्च आणि त्यांच्या भेटीगाठींबाबत त्यांनी अनेक प्रश्न उपस्थित केले आहेत.

माध्यमांशी बोलताना अंजली दमानिया म्हणाल्या की, “जर खासदार चार्टर्ड विमानाने दिल्लीला जात असतील, तर त्या प्रवासाचा खर्च नेमका कोण करत आहे? सार्वजनिक जीवनातील लोकांच्या अशा दौऱ्यांबाबत पारदर्शकता असणे आवश्यक आहे.”

तसेच काही खासदार केंद्रीय गृहमंत्री अमित शाह यांची भेट घेणार असल्याच्या चर्चांवरही त्यांनी सवाल उपस्थित केला. “खासदार अमित शाह यांची भेट का घेणार आहेत? या भेटीमागचे नेमके कारण काय आहे?” असा प्रश्न त्यांनी उपस्थित केला.

राज्यातील सध्याच्या राजकीय परिस्थितीवर भाष्य करताना दमानिया यांनी लोकशाही व्यवस्थेबाबत चिंता व्यक्त केली. “आज जे काही राजकारण सुरू आहे ते पाहता आपण ज्या लोकशाहीबद्दल बोलतो, ती खऱ्या अर्थाने उरली आहे का, असा प्रश्न पडतो,” असे त्या म्हणाल्या.

यावेळी त्यांनी काही राजकीय समीकरणांबाबतही शंका व्यक्त केली. “या भेटीमागे काही मोठे राजकीय गणित आहे का? फडणवीस विरुद्ध अमित शाह असा काही अंतर्गत संघर्ष आहे का? याबाबत निश्चितपणे काही सांगता येत नाही. मात्र सध्या घडणाऱ्या घटनांमुळे अनेक प्रश्न निर्माण होत आहेत,” असे दमानिया यांनी नमूद केले.

दरम्यान, राज्यातील सुरू असलेल्या राजकीय हालचाली, खासदारांचे दिल्ली दौरे आणि विविध बैठकींमुळे राजकीय वातावरण तापले असून, अंजली दमानिया यांच्या या प्रतिक्रियेमुळे चर्चांना आणखी वेग आला आहे.