मोठी घोषणा! पंतप्रधानांच्या वाढदिवसानिमित्त सेवा पंधरवडा आयोजित, दिल्लीत हालचालींना वेग

भारतीय जनता पक्ष (भाजप) १७ सप्टेंबर ते २ ऑक्टोबर या कालावधीत सेवा पंधरवडा साजरा करणार आहे. पंतप्रधान नरेंद्र मोदी यांच्या वाढदिवसानिमित्त भाजपने १५ दिवसांची ही विशेष मोहीम आखली आहे. या पंधरवड्यात देशभरातील विविध राज्यांमध्ये विशेष कार्यक्रमांचे आयोजन करण्यात येणार आहे.

या सेवा पंधरवड्याच्या तयारीचा आढावा घेण्यासाठी एक महत्वपूर्ण बैठक आयोजित करण्यात आली होती. या बैठकीमध्ये कार्यक्रमांच्या नियोजनावर चर्चा करण्यात आली. भाजपने या मोहिमेसाठी सरचिटणीस विनोद तावडे यांची राष्ट्रीय संयोजक म्हणून नियुक्ती केली आहे. त्यांच्या नेतृत्वाखाली ही १५ दिवसांची सेवा मोहीम देशभरात राबवली जाईल.

पंतप्रधान मोदींच्या वाढदिवसापासून महात्मा गांधींच्या जयंतीपर्यंत चालणाऱ्या या पंधरवड्यात, भाजप कार्यकर्ते आणि पदाधिकारी विविध सेवाकार्यांमध्ये सहभागी होतील. जनतेपर्यंत पोहोचून सेवाभाव जपण्याचा हा पक्षाचा प्रयत्न आहे. या मोहिमेतून पंतप्रधान मोदींच्या जनसेवेचा संदेश सर्वसामान्यांपर्यंत पोहोचवला जाईल, असे पक्षाकडून सांगण्यात आले आहे.