Sanjay Gaikwad : बुलढाण्यात भाजप-शिवसेनेचा संघर्ष पेटला, थेट आमनेसामने…
बुलढाणा जिल्ह्यात भाजपच्या श्वेता महाले आणि शिवसेनेचे संजय गायकवाड यांच्यातील राजकीय संघर्ष तीव्र झाला आहे. महाले यांनी गायकवाडांच्या क्षेत्रात पतीचा वाढदिवस साजरा करत डिवचले, तर गायकवाडांनी त्यास प्रत्युत्तर दिले. वाढदिवसाच्या रॅलीनंतर एकमेकांवर आरोप-प्रत्यारोप करत "हुकुमशाही" आणि "दादागिरी" सारखे शब्द वापरले, ज्यामुळे महायुतीतील अंतर्गत वाद चव्हाट्यावर आला आहे.
बुलढाणा जिल्ह्यात महायुतीमधील प्रमुख घटक पक्ष भाजप आणि शिवसेनेत अंतर्गत संघर्ष सुरू आहे. भाजपच्या आमदार श्वेता महाले आणि शिवसेनेचे आमदार संजय गायकवाड यांच्यात सध्या तीव्र राजकीय वाद पाहायला मिळत आहे. या वादाची सुरुवात संजय गायकवाड यांनी त्यांच्या मुलाचा वाढदिवस आमदार महाले यांच्या चिखली मतदारसंघात साजरा करण्यापासून झाली. या कृतीला प्रत्युत्तर म्हणून श्वेता महाले यांनी त्यांचे पती आणि मुख्यमंत्री देवेंद्र फडणवीस यांचे खासगी सचिव विद्याधर महाले यांचा वाढदिवस बुलढाण्यात साजरा केला. या वाढदिवसाच्या निमित्ताने काढलेल्या रॅलीदरम्यान श्वेता महाले यांनी गायकवाडांना लक्ष्य केले. यानंतर संजय गायकवाड यांनीही पत्रकार परिषद घेऊन महालेंना तीव्र प्रत्युत्तर दिले.
जयस्तंभ चौकात महापुरुषांना पुष्पांजली वाहण्यासाठी गेल्यानंतर जाणीवपूर्वक वीज पुरवठा खंडित केल्याचा आरोप गायकवाडांनी केला. त्यांनी या प्रकाराला “हलकटपणा”, “दडपशाही” आणि “हुकुमशाही” संबोधले. बुलढाणा शहर असल्या प्रकारची “दादागिरी” सहन करणार नाही, असेही त्यांनी म्हटले आहे. गायकवाडांनी “जर दम असेल तर मैदानावर या” असे थेट आव्हान देखील दिले आहे.
