Dharashiv : येडेश्वरी खवा सेंटरला FDAचा मोठा दणका; 125 किलो खवा जप्त अन्, परवाना थेट…

धाराशिव जिल्ह्यातील येडेश्वरी खवा सेंटरवर अन्न व औषध प्रशासनाने (FDA) धडक कारवाई केली आहे. सेंटरमध्ये मोठ्या प्रमाणावर अस्वच्छता आढळून आली असून, अन्नसुरक्षा आणि सार्वजनिक आरोग्याशी संबंधित महत्त्वाच्या नियमांचे उल्लंघन केल्याचे समोर आले आहे. या गंभीर अनियमिततांमुळे अन्न व औषध प्रशासनाने तत्काळ पाऊल उचलत येडेश्वरी खवा सेंटरचा परवाना निलंबित केला आहे.

या कारवाईदरम्यान, अन्न सुरक्षा विभागाने केंद्रातून तब्बल १२५ किलो खवा जप्त केला आहे. जप्त केलेला खवा हा अन्नसुरक्षा मानकांनुसार योग्य नसल्याचा संशय व्यक्त करण्यात येत आहे. एफडीएच्या या कारवाईमुळे अन्नपदार्थांची निर्मिती करणाऱ्या व्यावसायिकांना योग्य मानके पाळण्याचे महत्त्व अधोरेखित झाले आहे. ग्राहकांना सुरक्षित आणि आरोग्यदायी अन्नपदार्थ मिळावेत, यासाठी अन्न व औषध प्रशासनाकडून नियमित तपासणी आणि आवश्यकतेनुसार कारवाई केली जाते. अशा प्रकारची कारवाई ग्राहकांच्या आरोग्याच्या संरक्षणासाठी अत्यंत महत्त्वाची मानली जाते.