उद्धव ठाकरे यांच्या शिवसेनेकडून आज लोकसभेच्या 17 जागांची पहिली यादी जाहीर करण्यात आली आहे. या यादीमध्ये लोकसभा वायव्य मुंबईतून उद्धव ठाकरे गटाने अमोल कीर्तिकर यांचे नाव जाहीर केले आहे. असे असताना आजच अमोल कीर्तिकर यांना ईडीने समन्स बजावले आहे. कोरोना महामारीदरम्यान खिचडी वितरणात झालेल्या कथित गैरव्यवहाराप्रकरणी त्यांना ईडीने समन्स बजावले आहे. तर यापूर्वी त्यांची आर्थिक गुन्हे शाखेनेही याचप्रकरणात चौकशी केली होती. अमोल कीर्तिकर यांना ईडीने समन्स बाजावल्यानंतर ठाकरे गटाचे नेते खादसार संजय राऊत यांनी यावर आपली प्रतिक्रिया दिली आहे. अमोल कीर्तिकरच उमेदवार राहणार आहेत. उमेदवार बदलले जाणार नाहीत, असं ठामपणे संजय राऊत यांनी म्हटले आहे. तर खिचडी चोराचं मी काम करणार नाही, खिचडी चोराचं समर्थन करणार नाही, अशी प्रतिक्रिया संजय निरूपम यांनी दिली होती. याला संजय राऊत यांनी प्रत्युत्तर दिलं आहे. तर अमोल कीर्तिकर यांच्या पाठीशी शिवसेना ठाम उभी राहणार, आम्ही शिवसैनिक घाबरणारे नाही, डरपोक नाही. जे घाबरणारे होते ते आधीच शिवसेनेतून पळून गेल्याचे संजय राऊत यांनी म्हटले आहे.