वचननामा मुंबईकरांसाठी बदल घडवणारा ठरेल! शिंदेंनी व्यक्त केला विश्वास

मुंबई महानगरपालिका निवडणुकीच्या पार्श्वभूमीवर, महायुतीने आपला वचननामा प्रसिद्ध केला आहे. उपमुख्यमंत्री एकनाथ शिंदे यांनी मुंबईतील एका कार्यक्रमात हा वचननामा सादर केला. यावेळी मुख्यमंत्री देवेंद्र फडणवीस, केंद्रीय राज्यमंत्री रामदास आठवले, विनोद तावडे, आशिष शेलार, योगेश कदम, अमित साटम, मिलिंद देवरा, राहुल शेवाळे यांच्यासह अनेक पदाधिकारी उपस्थित होते.

शिंदे यांनी विश्वास व्यक्त केला की, हा वचननामा मुंबईकरांच्या दैनंदिन जीवनात सकारात्मक बदल घडवेल आणि त्यांना दिलासा देईल. त्यांनी मुंबईला देशाची आर्थिक राजधानी, महाराष्ट्राचा प्राण आणि ग्रोथ इंजिन असे संबोधले. पुढील पाच वर्षांत मुंबईला जागतिक दर्जाचे शहर बनवण्याचे वचन महायुतीने दिले आहे. केंद्रात आणि राज्यात महायुतीचे सरकार असल्याने, १६ तारखेला मुंबई महापालिकेवर भगवा फडकल्यानंतर मुंबईचा खरा ‘मेकोव्हर’ सुरू होईल, असेही ते म्हणाले. मुंबईतील मराठी माणसांच्या हिताचे, मराठी भाषेचे आणि संपन्न मराठी संस्कृतीचे रक्षण करणे ही महायुतीची जबाबदारी असल्याचे शिंदे यांनी अधोरेखित केले.