कधी-कधी राजकीय नेतेही विनोदाचा भाग होतात! शिंदेंचा मिश्किल टोला

मराठी भाषा गौरव दिनानिमित्त जावे विनोदाच्या गावा या विशेष कार्यक्रमाचे आयोजन करण्यात आले. या कार्यक्रमात उपमुख्यमंत्री एकनाथ शिंदे यांनी मराठी भाषेच्या समृद्ध परंपरेवर प्रकाश टाकला. त्यांनी कवीश्रेष्ठ कुसुमाग्रजांना वंदन करत, मराठी भाषेचे महत्त्व विशद केले. शिंदे म्हणाले की, मराठी केवळ संवादाचे माध्यम नाही, तर हजारो वर्षांची सांस्कृतिक परंपरा वाहून नेणारा एक पवित्र प्रवाह आहे.

मराठी माणसाच्या रक्तातच विनोद आहे, असे प्रतिपादन करत त्यांनी आचार्य अत्रे आणि पु. ल. देशपांडे यांसारख्या विनोदाच्या शिखरांचे स्मरण केले. विधिमंडळ अधिवेशनाच्या तापलेल्या वातावरणात विनोदामुळे तणाव निवळतो, असेही त्यांनी नमूद केले. माय मराठीला अभिजात भाषेचा दर्जा मिळाल्याचा ऐतिहासिक क्षण अधोरेखित करत, मातृभाषेतून शिक्षण आणि व्यवहारात मराठीचा प्रभावी वापर करण्याचे आवाहन त्यांनी केले. मराठी भाषा ही रोजगाराची भाषा व्हावी आणि तिचा झेंडा सातासमुद्रापार फडकत राहावा, असा संकल्पही त्यांनी व्यक्त केला.