ठाकरेंचा टोमणेनामा, आमचा विकासनामा! एकनाथ शिंदेंचा टोला

एकनाथ शिंदे यांनी नुकतेच बाळासाहेब ठाकरे यांच्या जन्मशताब्दी वर्षाच्या निमित्ताने विविध कल्याणकारी योजना जाहीर केल्या. बाळासाहेबांचा “८०% समाजकारण, २०% राजकारण” हा मूलमंत्र जपून आरोग्य, शिक्षण आणि इतर लोकोपयोगी उपक्रम वर्षभर राबवण्याचे शिंदे यांनी सांगितले.

यावेळी त्यांनी विरोधकांच्या वचननाम्यावर जोरदार टीका केली. त्यांच्या वचननाम्यात हिंदुरुदय सम्राट बाळासाहेब ठाकरे, मराठी भाषा किंवा हिंदुत्वाचा साधा उल्लेखही नसल्याचे शिंदे यांनी निदर्शनास आणले. याच्या उलट, त्यांनी आपल्या सरकारचा विकासनामा सादर केला, जो कल्याणकारी योजना आणि विकासाच्या अजेंड्यावर आधारित आहे. विरोधकांचा वचननामा म्हणजे टोमणेनामा किंवा घोटाळेनामा असून, आपला वचननामा हा विकासनामा असल्याचे शिंदे यांनी स्पष्ट केले.

शिंदे यांनी मराठी तरुणांसाठी शिक्षण, रोजगार, उद्योजक धोरणे, बाळासाहेब ठाकरे वैद्यकीय विद्यापीठाची उभारणी, मराठी भाषेला समृद्ध करण्यासाठी उपाययोजना, ग्रंथालय व सांस्कृतिक केंद्रांची वाढ आणि मराठी तरुणांसाठी फेलोशिप यांसारख्या योजनांचा उल्लेख केला. मुंबईतील मराठी माणसाला पुन्हा स्थान देण्यासाठी सरकार कटिबद्ध असल्याचे त्यांनी सांगितले. आशिष शेलार यांनी सुचविल्याप्रमाणे मराठी सिनेमांसाठी हक्काचे सिनेमागृह आणि नाट्यकलांसाठी तीन नाट्यगृहे उभारण्याचा संकल्पही त्यांनी जाहीर केला. मुंबई महानगरपालिकेत तंत्रज्ञानाचा वापर करून भ्रष्टाचारमुक्त कारभार करण्याचे आश्वासनही देण्यात आले.