Devendra Fadnavis : मी जेव्हा जेव्हा सांगतो मी पुन्हा येईल, तेव्हा मी येतोच! फडणवीसांचा तो जुना डायलॉग पुन्हा चर्चेत

मुख्यमंत्री देवेंद्र फडणवीस यांनी दिवंगत आमदार अण्णासाहेब पाटील यांच्या जयंतीनिमित्त आयोजित कार्यक्रमात माथाडी कामगार आणि मराठा समाजाच्या कल्याणासाठी सरकारच्या वचनबद्धतेचा पुनरुच्चार केला. गणेश विसर्जनाचा दिवस असूनही, फडणवीस यांनी कार्यक्रमाला उपस्थिती लावत, अण्णासाहेब पाटील यांच्या कार्याचे कौतुक केले.

फडणवीस यांनी सांगितले की, अण्णासाहेब पाटील यांनी माथाडी कामगारांसाठी कायदा आणून त्यांना सामाजिक सुरक्षा मिळवून दिली. त्यांच्या दूरदृष्टीमुळे अनेक पिढ्या हलाखीच्या जीवनातून बाहेर पडल्या. तसेच, मराठा आरक्षणासाठी अण्णासाहेब पाटील यांनी केलेल्या संघर्षाचीही त्यांनी आठवण करून दिली. मराठा समाजाला शिक्षण आणि नोकऱ्यांमध्ये न्याय मिळवून देण्यासाठी अण्णासाहेब पाटील यांनी केलेले बलिदान कधीही विसरता येणार नाही, असे ते म्हणाले.

यावेळी फडणवीस यांनी मराठा आरक्षणासंदर्भात राज्य सरकारने घेतलेले एसीबीसी आणि केंद्र सरकारने लागू केलेले ईडब्ल्यूएस आरक्षणाचे फायदे विशद केले. तसेच, अण्णासाहेब पाटील आर्थिक विकास महामंडळ आणि सारथीच्या माध्यमातून मराठा तरुणांना उद्योजक बनवण्याचे आणि स्पर्धा परीक्षांसाठी प्रोत्साहन देण्याचे कार्य सुरू असल्याचे सांगितले. माथाडी कायद्याचे संरक्षण आणि वडाळ्यातील कामगारांच्या घरांचा प्रश्न सोडवण्यावरही त्यांनी भर दिला. आपल्या भाषणात “मी जेव्हा जेव्हा सांगतो मी पुन्हा येईल तेव्हा मी येतोच” या आपल्या परिचित विधानाचाही त्यांनी पुनरुच्चार केला.