ढोल-ताशांच्या गजरात चिंचपोकळीच्या चिंतामणीला निरोप; गिरगाव चौपाटीवर भाविकांची गर्दी
मुंबईच्या गिरगाव चौपाटीवर लालबागच्या राजासोबत चिंचपोकळीच्या चिंतामणीचे विसर्जन मोठ्या उत्साहात होत आहे. तिरुपती बालाजीच्या रूपाला प्रेरित होऊन बनवलेली, २४ फूट उंच चिंतामणीची मूर्ती दक्षिण भारतीय मंदिराच्या शैलीचा प्रभाव दर्शवते. हजारो भाविक आपल्या लाडक्या बाप्पाला निरोप देण्यासाठी उपस्थित आहेत, त्यांच्या डोळ्यात उत्साह आणि भावनिक क्षण दिसून येत आहेत.
मुंबईच्या गिरगाव चौपाटीवर गणेश विसर्जनाचा भव्य सोहळा सुरू आहे. अरबी समुद्रात हेलकावे घेणाऱ्या बोटींच्या मदतीने लालबागच्या राजाची मूर्ती विसर्जनासाठी नेली जात असतानाच, मागोमाग चिंचपोकळीचा चिंतामणी देखील विसर्जनासाठी सज्ज झाला आहे. गिरगाव चौपाटीवर हजारो गणेशभक्त आणि गणेश मंडळाचे कार्यकर्ते बाप्पाला निरोप देण्यासाठी उपस्थित आहेत. यावर्षीचा चिंचपोकळीचा चिंतामणी २४ फूट उंच असून, तिरुपती बालाजीच्या रूपाला प्रेरित होऊन ही मूर्ती साकारण्यात आली आहे.
दक्षिण भारतीय मंदिर शैलीचा प्रभाव या मूर्तीमध्ये स्पष्टपणे दिसतो. भव्य सिंहासनावर विराजमान झालेली ही मूर्ती यंदाच्या गणेशोत्सवाचे एक प्रमुख आकर्षण ठरली होती. लालबागचा राजा आणि चिंचपोकळीचा चिंतामणी या दोन्ही गणपतींच्या दर्शनासाठी गेल्या ११ दिवसांपासून भक्तांची रीघ लागलेली होती. आता गुलालाची उधळण, फुलांची बरसात करत भक्त आपल्या लाडक्या गणपतीला भावपूर्ण निरोप देत आहेत. बाप्पाला निरोप देताना भक्तांमध्ये उत्साहासोबतच एक भावनिक वातावरणही अनुभवायला मिळत आहे.
