Kalachowki : गणेशोत्सवात महागणपती मंडपात काळीज पिळवटून टाकणारी घटना

मुंबईतील काळाचौकी येथील महागणपती मंडपातून एक हृदयद्रावक बातमी समोर आली आहे. शनिवारी रात्री उशिरा मंडपाच्या परिसरात विजेचा धक्का लागून एक आठ वर्षांची चिमुकली आणि एक ३३ वर्षीय महिला यांचा दुर्दैवी मृत्यू झाला. या दुर्घटनेत तीन अन्य जण गंभीर जखमी झाले असून, त्यांना तातडीने मुंबईतील मसिना रुग्णालयात दाखल करण्यात आले आहे, जिथे त्यांच्यावर अतिदक्षता विभागात (ICU) उपचार सुरू आहेत. अग्निशमन दलाने दिलेल्या माहितीनुसार, ही घटना रात्री २ वाजण्याच्या सुमारास घडली.

मृत्यू झालेल्यांमध्ये बिहारहून गणेश दर्शनासाठी आलेल्या कुटुंबातील आठ वर्षीय रागिणी यादव आणि ३३ वर्षीय सुजाता थोट्टीटी यांचा समावेश आहे. हे कुटुंब लालबागच्या राजाचे दर्शन घेण्यासाठी आले असताना काळाचौकी महागणपती मंडपात थांबले होते. या घटनेमुळे मुंबईतील गणेशोत्सवातील सुरक्षा व्यवस्थेवर प्रश्नचिन्ह निर्माण झाले आहे. यंदाच्या गणेशोत्सवातील विजेच्या धक्क्याने जीव गमावल्याची ही पहिली घटना असून, यापूर्वी भुलेश्वर राजाच्या आगमन सोहळ्यात मूर्ती कोसळून दोन तरुणांचा मृत्यू झाला होता, तर कुर्ल्यात प्रेमनगरच्या महाराजा गणपतीची मूर्ती कोसळल्याने दोन तरुण जखमी झाले होते. प्रशासनाने या प्रकरणाची गंभीर दखल घेऊन योग्य ती कार्यवाही करणे आवश्यक आहे.