महिलांच्या डब्यात चढणाऱ्या तरुणीला केस ओढून बाहेर काढलं! लोकलमधील धक्कादायक प्रकार

कल्याणमधून जाणाऱ्या लोकल ट्रेनमध्ये एक धक्कादायक प्रकार घडला आहे. महिलांच्या डब्यातून एका तरुणीला केस ओढून खाली उतरवण्यात आले, ज्याचा व्हिडिओ मोठ्या प्रमाणात व्हायरल झाला आहे. कल्याण ते बदलापूर दरम्यान धावणाऱ्या लोकलमध्ये हा संपूर्ण प्रकार घडला.

या घटनेमध्ये तीन ते चार महिला प्रवाशांनी मिळून एका तरुणीचे केस ओढले आणि तिला लोकल मधून खाली उतरवण्याचा प्रयत्न केला. हा संपूर्ण प्रसंग एका मोबाईलमध्ये कैद झाला आहे, ज्यात महिला प्रवाशांची दादागिरी स्पष्टपणे दिसत आहे. प्रचंड गर्दी असलेल्या लोकलमध्ये हा प्रकार घडल्याने अनेक प्रश्न निर्माण झाले आहेत. मारहाण करून खाली उतरवण्याचा प्रयत्न केला गेल्याचे दृश्यांमध्ये दिसत आहे. एकदा असा प्रसंग घडल्यावर नेमका जबाबदार कोण, असा सवाल या घटनेनंतर उपस्थित होत आहे. ही संपूर्ण घटना कल्याण येथे घडली असून, महिलांच्या सुरक्षित प्रवासावर यानिमित्ताने पुन्हा एकदा चर्चा सुरू झाली आहे.