Lalbaugcha Raja Visarjan | थोड्याच वेळात लालबागच्या राजचं विसर्जन होणार, भाविकांचे डोळे पाणावले

मुंबईतील अथांग समुद्राला आज लालबागच्या राजाच्या विसर्जनाची ओढ लागलेली आहे. ज्याच्या दर्शनासाठी लाखो भाविकांनी वर्षभर वाट पाहिली, तो लाडका लालबागचा राजा आता सर्वांचा निरोप घेण्यासाठी सज्ज झाला आहे. हा क्षण भाविकांसाठी अत्यंत भावनिक आहे. गिरगाव चौपाटीवर जमलेल्या प्रत्येक भाविकाच्या मुखात गणपती बाप्पा मोरया, पुढच्या वर्षी लवकर या हा जयघोष घुमत आहे. कुणाच्या डोळ्यात अश्रू आहेत, तर कुणी हात जोडून बाप्पाकडे शेवटची इच्छा मागत आहे. बाप्पाच्या आगमनाचा आनंद जितका मोठा असतो, तितकाच विसर्जनाचा क्षण हृदयस्पर्शी असतो.

दहा दिवस बाप्पा घरात, मंडळात आणि आपल्या मनात विराजमान होता. आता त्याला निरोप देण्याची वेळ आली आहे. फुलांनी आकर्षकपणे सजवलेल्या तराफ्यावर बाप्पाला विराजमान करण्यात आले आहे. कोळी बांधवांच्या मार्गदर्शनाखाली हा तराफा हळूहळू समुद्राच्या दिशेने सरकत आहे. अवघ्या काही क्षणांतच बाप्पाला खोल समुद्रात निरोप दिला जाईल. हा क्षण दहा दिवसांच्या आठवणी, नवस आणि अतूट नात्याची साक्ष देत आहे.