CM Fadnavis : मुख्यमंत्र्यांची महायुतीच्या आमदारांसोबत ‘ब्रेकफास्ट मिटिंग’, तासभर नेमकी कशावर चर्चा?

नागपूर येथे सुरू असलेल्या हिवाळी अधिवेशनाचा आज चौथा दिवस असून, विविध राजकीय घडामोडींनी राज्याच्या राजकारणात वेग घेतला आहे. मुख्यमंत्र्यांनी महायुतीच्या आमदारांसाठी आयोजित केलेली ब्रेकफास्ट मिटिंग हे आजच्या दिवसातील प्रमुख आकर्षण ठरले. मुख्यमंत्री देवेंद्र फडणवीस यांच्या शासकीय निवासस्थानी रामगिरी येथे ही बैठक गेल्या तासाभरापासून सुरू होती. या बैठकीत आगामी निवडणुका आणि विधिमंडळाच्या कामकाजासंदर्भात महत्त्वाच्या सूचना व धोरणात्मक चर्चा झाल्याची शक्यता वर्तवण्यात आली. मुख्यमंत्र्यांनी महायुतीच्या सर्व आमदारांना खास नाश्त्याचे निमंत्रण देऊन या बैठकीचे आयोजन केले होते. महायुतीमधील एकजूट आणि आगामी काळातील रणनीती यावर मंथन होणे अपेक्षित होते. हिवाळी अधिवेशनाच्या पार्श्वभूमीवर विधिमंडळातील कामकाज अधिक प्रभावीपणे कसे राबवायचे, यावरही चर्चा झाली.